വിദേശ കോച്ചിന് വഴിയൊരുക്കാൻ പരിശീലക സ്ഥാനത്തുനിന്ന് പുറത്താക്കുന്നു: പി ആർ ശ്രീജേഷ്

ന്യൂഡൽ​ഹി: ഇന്ത്യൻ ഹോക്കി ഫെഡറേഷനെ രൂക്ഷമായി വിമർശിച്ച് ഇന്ത്യൻ താരവും ദേശീയ ജൂനിയർ ടീമിന്റെ പരിശീലകനുമായ പി ആർ ശ്രീജേഷ്. വിദേശ പരിശീലകന് വഴിയൊരുക്കാൻ വേണ്ടി തന്നെ പരിശീലക സ്ഥാനത്തുനിന്ന് പുറത്താക്കുന്നുവെന്ന് ശ്രീജേഷ് എക്സിൽ കുറിച്ചു.

വിദേശ പരിശീലകരുണ്ടെങ്കിൽ മാത്രമേ വിജയിക്കാനാവു എന്ന മിഥ്യ ധാരണയുണ്ടെന്നും ഇന്ത്യൻ പരിശീലകർക്ക് ഇന്ത്യൻ ഹോക്കി വികസിപ്പിക്കാൻ കഴിയില്ലേ? എന്നും ശ്രീജേഷ് ചോദിക്കുന്നു. അതേസമയം, ശ്രീജേഷിനെ പുറത്താക്കിയതല്ലെന്നും മറിച്ച് അദ്ദേഹത്തിന്‍റെ കരാർ അവസാനിച്ചതാണെന്നുമാണ് ഹോക്കി ഇന്ത്യ നൽകുന്ന വിശദീകരണം.

2024 പാരിസ്‌ ഒളിമ്പിക്‌സിനുശേഷമാണ് ശ്രീജേഷ് ജൂനിയർ ടീമിന്റെ പരിശീലന ചുമതല ഏറ്റെടുത്തത്. ഒളിമ്പിക്‌സിൽ രണ്ട്‌ തവണ വെങ്കലം നേടിയ ഇന്ത്യൻ ഹോക്കി ടീമിന്റെ ഗോൾകീപ്പറായിരുന്നു ശ്രീജേഷ്.

പി ആർ ശ്രീജേഷിന്റെ എക്സ് പോസ്റ്റ്

ഒന്നര വർഷത്തെ എന്റെ പരിശീലക ജീവിതം അവസാനിക്കുകയാണെന്ന് തോന്നുന്നു. ഈ കാലയളവിൽ ഞങ്ങൾ 5 ടൂർണമെന്റുകളിൽ കളിക്കുകയും, ജൂനിയർ ലോകകപ്പിലെ വെങ്കല മെഡൽ ഉൾപ്പെടെ 5 തവണ പോഡിയം ഫിനിഷുകൾ നേടുകയും ചെയ്തു.

മോശം പ്രകടനത്തിന്റെ പേരിൽ പരിശീലകരെ പുറത്താക്കുന്നതിനെക്കുറിച്ച് ഞാൻ കേട്ടിട്ടുണ്ട്. എന്നാൽ ഒരു വിദേശ പരിശീലകന് വഴിയൊരുക്കാൻ വേണ്ടി പുറത്താക്കപ്പെടുന്നത് ഇതാദ്യമായാണ്.

ജൂനിയർ തലം മുതൽ സീനിയർ തലം വരെ ഇന്ത്യൻ ഹോക്കിയുടെ വികസനത്തിന് അത് സഹായിക്കുമെന്ന് വിശ്വസിച്ചുകൊണ്ട്, ജൂനിയർ ടീമിന് ഒരു വിദേശ ഹെഡ് കോച്ചിനെയാണ് സീനിയർ പുരുഷ ടീമിന്റെ ചീഫ് കോച്ച് താൽപ്പര്യപ്പെടുന്നതെന്ന് ഹോക്കി ഇന്ത്യ പ്രസിഡന്റ് പ്രസ്താവിച്ചു. അതുകൊണ്ട് തന്നെ, വിദേശ പരിശീലകർക്കുള്ള മുൻഗണന ഇന്നും തുടരുന്നു —

ഇന്ത്യൻ പരിശീലകർക്ക് ഇന്ത്യൻ ഹോക്കി വികസിപ്പിക്കാൻ കഴിയില്ലേ?

2026 മാർച്ച് 7-ന്, ബഹുമാനപ്പെട്ട കായിക മന്ത്രി ശ്രീ മൻസുഖ് മാണ്ഡവ്യയുമായുള്ള കൂടിക്കാഴ്ചയിൽ അദ്ദേഹം എന്നോട് പറഞ്ഞത് ഇങ്ങനെയാണ്: "ശ്രീജേഷ്, 2036-ലേക്ക് തയ്യാറെടുക്കുമ്പോൾ നമ്മുടെ രാജ്യത്തെ നയിക്കാൻ നിങ്ങളെപ്പോലുള്ള പരിശീലകരെ ഞങ്ങൾക്ക് ആവശ്യമുണ്ട്."

എന്നിരുന്നാലും, നാല് ടീമുകളിലും ഇന്ത്യൻ പരിശീലകരേക്കാൾ വിദേശ പരിശീലകരിലാണ് ഹോക്കി ഇന്ത്യ ഇപ്പോഴും വിശ്വാസമർപ്പിക്കുന്നത്.