ബം​ഗാൾ മെഡിക്കല്‍ കോളജില്‍ വീണ്ടും ലൈംഗികാതിക്രമം; വിദ്യാർഥിനിയെ വലിച്ചിഴച്ച് കൊണ്ടുപോയി ബലാത്സംഗം ചെയ്തു

ദുർഗാപൂർ: പശ്ചിമ ബംഗാളിൽ വീണ്ടും മെഡിക്കൽ വിദ്യാർഥിനിക്ക് നേരെ ലൈംഗികാതിക്രമം. ദുർഗാപൂരിലെ ഒരു സ്വകാര്യ മെഡിക്കൽ കോളേജ് ക്യാമ്പസിനോട് ചേർന്ന ആശുപത്രി വളപ്പിൽ വെച്ച് രണ്ടാം വർഷ വിദ്യാർഥിനിയെ വലിച്ചിഴച്ച് കൊണ്ടുപോയി ബലാത്സംഗം ചെയ്തതായി പരാതി. ഒഡീഷയിലെ ജാലേശ്വർ സ്വദേശിനിയായ വിദ്യാർഥിനിയാണ് ലൈം​ഗികാതിക്രമത്തിന് ഇരയായത്.

കഴിഞ്ഞ ദിവസം രാത്രി 8.30 ഓടെ സുഹൃത്തിനൊപ്പം വിദ്യാർഥിനി ക്യാമ്പസിൽ നിന്ന് പുറത്തേയ്‌ക്ക്‌ വരുമ്പോഴാണ്‌ സംഭവം. ക്യാമ്പസ് ഗേറ്റിന് സമീപം വെച്ച് ഒരാൾ വിദ്യാർഥിനിയെ ബലം പ്രയോഗിച്ച് ആശുപത്രിക്ക് പിന്നിലെ ആളൊഴിഞ്ഞ ഭാഗത്തേക്ക് വലിച്ചിഴച്ചു കൊണ്ടുപോവുകയും ബലാത്സംഗം ചെയ്യുകയുമായിരുന്നു.

പൊലീസ് സ്ഥലത്തെത്തി പെൺകുട്ടിയെ വൈദ്യപരിശോധനക്കായി ആശുപത്രിയിൽ എത്തിച്ചു. കോളേജ് ജീവനക്കാർ, വിദ്യാർഥിനിക്കൊപ്പം ഉണ്ടായിരുന്ന സുഹൃത്ത് എന്നിവരുൾപ്പെടെയുള്ളവരെ പൊലീസ് ചോദ്യം ചെയ്തു വരികയാണ്.

മകളുടെ സുഹൃത്താണ് വിവരം അറിയിച്ചതെന്ന് വിദ്യാർഥിനിയുടെ പിതാവ് പറഞ്ഞു. "ഞാൻ അവിടെ എത്തിയപ്പോൾ എന്റെ മകളുടെ നില ഗുരുതരമായിരുന്നു, ആശുപത്രി അധികൃതരിൽ നിന്ന് ഒരു പ്രതികരണവും ലഭിച്ചില്ല," അദ്ദേഹം ആരോപിച്ചു. സുഹൃത്ത് വിളിച്ചതിനെ തുടർന്ന് മകൾ ഗോൾഗപ്പ കഴിക്കാൻ ക്യാമ്പസിന് പുറത്ത് പോയിരുന്നുവെന്നും അദ്ദേഹം പറഞ്ഞു.