അവശ്യസാധനങ്ങൾ എത്തുന്നില്ല; മണിപ്പൂരിൽ എൽപിജി സിലിണ്ടറിന് 5,000 വരെ വില

ന്യൂഡൽഹി: വംശീയ സംഘർഷങ്ങൾ വിട്ടൊഴിയാത്ത മണിപ്പൂരിൽ സാമ്പത്തിക ഉപരോധം കടുക്കുന്നതോടെ അവശ്യസാധനങ്ങളുടെ വില കുതിച്ചുയരുന്നു. മണിപ്പൂരിലെ കാംഗ്പോക്പി ജില്ലയിൽ ഒരു എൽപിജി പാചകവാതക സിലിണ്ടറിന് കരിഞ്ചന്തയിൽ 5,000 രൂപ വരെയാണ് ഈടാക്കുന്നത്. ഉപരോധം ശക്തമായതിനെ തുടർന്ന് കഴിഞ്ഞ ഒരു മാസമായി ജില്ലയിലേക്ക് അവശ്യസാധനങ്ങളുടെ വരവ് പൂർണ്ണമായി നിലച്ച മട്ടാണ്.

കാംഗ്പോക്പി മണ്ഡലത്തെ പ്രതിനിധീകരിക്കുന്ന ഉപമുഖ്യമന്ത്രി നെംച കിപ്ഗന് മാസങ്ങളായി സംസ്ഥാന തലസ്ഥാനമായ ഇംഫാലിലേക്ക് യാത്ര ചെയ്യാൻ സാധിച്ചിട്ടില്ല. ഇംഫാലിൽ മുഖ്യമന്ത്രി വൈ ഖേംചന്ദ് സിങ്ങിന്റെ അധ്യക്ഷതയിൽ ചേരുന്ന യോഗങ്ങളിൽ അവർ ഇപ്പോഴും ഓൺലൈനായാണ് പങ്കെടുക്കുന്നത്. ഫെബ്രുവരിയിൽ രാഷ്ട്രപതി ഭരണം പിൻവലിച്ചതിന് ശേഷം മണിപ്പൂരിൽ പുതിയ തരംഗമായി പടർന്ന വംശീയ അക്രമങ്ങളിൽ 40-ലധികം ആളുകൾ കൊല്ലപ്പെട്ടിട്ടുണ്ട്. നാഗാ, കുക്കി വിഭാഗങ്ങളിലേക്ക് കൂടി ഇപ്പോൾ സംഘർഷം വ്യാപിച്ചിരിക്കുകയാണ്.

കാംഗ്പോക്പി ജില്ലയുടെ ഭൂമിശാസ്ത്രപരമായ സ്ഥാനം പ്രതിസന്ധി ഇരട്ടിയാക്കുന്നു. വടക്ക് നാഗാ വിഭാഗത്തിന് മേധാവിത്വമുള്ള സേനാപതി ജില്ലയും, തെക്ക് മെയ്തേയ് വിഭാഗത്തിന് മേധാവിത്വമുള്ള താഴ്‌വര പ്രദേശങ്ങളുമാണ് അതിർത്തികൾ. കുക്കി വിഭാഗത്തിനാണ് കാംഗ്പോക്പിയിൽ ഭൂരിപക്ഷമുള്ളത്. മെയ് 13 മുതൽ നാഗാ ഗ്രാമീണർ ചരക്ക് നീക്കങ്ങൾക്ക് ഉപരോധം ഏർപ്പെടുത്തിയതോടെ പുറത്തുനിന്നുള്ള അവശ്യസാധനങ്ങളുടെ ഗതാഗതം പൂർണ്ണമായി തടസ്സപ്പെട്ടു.

ഇതോടെ കടുത്ത പ്രാദേശിക വിലക്കയറ്റമാണ് ജില്ലയിൽ അനുഭവപ്പെടുന്നത്. മുൻപ് 1,400 മുതൽ 1,700 രൂപ വരെ വിലയുണ്ടായിരുന്ന 50-കിലോഗ്രാം അരി ചാക്കിന് ഇപ്പോൾ കരിഞ്ചന്തയിൽ 4,000 രൂപ വരെ ഈടാക്കുന്നതായി സദർ ഹിൽസ് സിവിൽ സൊസൈറ്റി ഗ്രൂപ്പ് പ്രസിഡന്റ് തങ്മിൻലെൻ കിപ്ഗൻ വ്യക്തമാക്കി. പാചകവാതക ക്ഷാമം രൂക്ഷമായതോടെ ആളുകൾ ഇൻഡക്ഷൻ കുക്കറുകളിലേക്ക് മാറിയെങ്കിലും, ദിവസേന 7 മുതൽ 8 മണിക്കൂർ വരെ നീളുന്ന വൈദ്യുതി തടസ്സം ജനജീവിതം കൂടുതൽ ദുസ്സഹമാക്കുന്നുണ്ട്. പെട്രോൾ ലിറ്ററിന് 250 മുതൽ 280 രൂപ വരെയാണ് നിലവിലെ വില. ഈ വിലക്കയറ്റം നിയന്ത്രിക്കാൻ നിലവിൽ യാതൊരു മാർഗ്ഗവുമില്ലെന്ന് അധികൃതർ സമ്മതിക്കുന്നു.

ദേശീയപാത 2-ൽ വിവിധ ഗ്രൂപ്പുകൾ അനധികൃതമായി സ്ഥാപിച്ചിട്ടുള്ള ഉപരോധങ്ങൾ നീക്കം ചെയ്യാനും അവശ്യസാധനങ്ങളുമായി പോകുന്ന വാഹനങ്ങൾക്ക് സുരക്ഷയൊരുക്കാനും ശ്രമങ്ങൾ നടക്കുന്നുണ്ടെന്ന് സുരക്ഷാസേന അറിയിച്ചു. കഴിഞ്ഞ ഒരാഴ്ചയ്ക്കിടെ വിവിധ ഗ്രാമങ്ങളിലായി സ്ഥാപിച്ചിരുന്ന മുപ്പതോളം ബങ്കറുകൾ സുരക്ഷാസേന തകർത്തിട്ടുണ്ട്. ഭീകര അന്തരീക്ഷം നിലനിൽക്കുന്ന പശ്ചാത്തലത്തിൽ, അവശ്യസാധനങ്ങൾ എത്തിക്കുന്ന കോൺവോയ് വാഹനങ്ങൾക്ക് കൂടുതൽ സുരക്ഷ ഉറപ്പാക്കണമെന്ന് ട്രക്ക് ഡ്രൈവർമാരും ആവശ്യപ്പെടുന്നുണ്ട്.