ടാറ്റ ഗ്രൂപ്പിൽ ഉൾപ്പോര്; പരിഹാരം കാണാൻ അമിത് ഷായുമായി കൂടിക്കാഴ്ച

ന്യൂഡൽഹി: ടാറ്റ ട്രസ്റ്റ് അംഗങ്ങൾക്കിടയിൽ ഉൾപ്പോര്. വിഷയങ്ങൾ ഗ്രൂപ്പിന്റെ പ്രവർത്തനത്തെപോലും ബാധിക്കുന്ന സാഹചര്യത്തിലെത്തിയതോടെ ട്രസ്റ്റിലെ പ്രധാന അംഗങ്ങൾ കേന്ദ്ര ആഭ്യന്തരമന്ത്രി അമിത് ഷായുമായി കൂടിക്കാഴ്ച നടത്തി.

ടാറ്റ സൺസ് ചെയർമാൻ എൻ ചന്ദ്രശേഖരൻ, ടാറ്റ ട്രസ്റ്റ്‌സ് ചെയർമാൻ നോയൽ ടാറ്റ, ട്രസ്റ്റ് വൈസ് ചെയർമാൻ വേണു ശ്രീനിവാസൻ, ട്രസ്റ്റി ദാരിയസ് ഖംബട്ട എന്നിവരാണ് അമിത് ഷായും ധനമന്ത്രി നിർമല സീതാരാമനുമായി കൂടിക്കാഴ്ച നടത്തിയത്.

കമ്പനിയുടെ പബ്ലിക്ക് ലിസ്റ്റിങ്ങിൽ തീരുമാനമെടുക്കാനും ട്രസ്റ്റ് അംഗങ്ങൾ തമ്മിലുള്ള തർക്കങ്ങൾക്ക് പരിഹാരം കാണാനുമായിരുന്നു കൂടിക്കാഴ്ച. ടാറ്റ ട്രസ്റ്റിലെ പ്രശ്നങ്ങൾ ടാറ്റയുടെ പ്രവർത്തനത്തെ തന്നെ കാര്യമായി ബാധിക്കും.

ടാറ്റാ ട്രസ്റ്റിന് 66 ശതമാനം ഓഹരി ടാറ്റ സൺസിലാണ്. ടാറ്റ സൺസിന്റെ ബോർഡിലേക്ക് നോമിനി ഡയറക്ടർമാരെ നിയമിക്കുന്നതുമായി ബന്ധപ്പെട്ടാണ് ട്രസ്റ്റിൽ തർക്കങ്ങൾ രൂപപ്പെട്ടത്. ബോർഡ് അജണ്ടകൾ തീരുമാനിക്കുന്നതിൽ പങ്കാളിത്തം വേണമെന്നും ആവശ്യമുണ്ട്.

പ്രധാനപ്പെട്ട തീരുമാനങ്ങൾ എടുക്കുമ്പോൾ ട്രസ്റ്റ് അംഗങ്ങളുടെ കൂടെ അനുമതി തേടണമെന്നതും തർക്കങ്ങൾക്ക് കാരണമാക്കി. മാസങ്ങളായി അംഗങ്ങൾ തമ്മിൽ ഇത്തരം തർക്കങ്ങളും ഭിന്നതകളും തുടരുന്നു എന്നതും ആശങ്കയുളവാക്കുന്നു.