ഇറാനിയൻ എണ്ണക്കപ്പലുകൾ മടക്കി അയച്ചിട്ടില്ല; ആരോപണം തള്ളി പെട്രോളിയം മന്ത്രാലയം

ന്യൂഡൽഹി : അമേരിക്കയുടെ ഉപരോധ ഭീഷണികളെ വകവെക്കാതെ ഇറാനിൽ നിന്നുള്ള എണ്ണ ഇറക്കുമതിയുമായി ഇന്ത്യ മുന്നോട്ട്. പേയ്‌മെന്റ് തടസങ്ങൾ കാരണം ഇറാനിയൻ എണ്ണക്കപ്പലുകൾ ഇന്ത്യൻ തീരത്തുനിന്ന് തിരിച്ചുവിട്ടെന്ന തരത്തിൽ പ്രചരിക്കുന്ന വാർത്തകൾ അടിസ്ഥാനരഹിതമാണെന്ന് കേന്ദ്ര പെട്രോളിയം പ്രകൃതിവാതക മന്ത്രാലയം വ്യക്തമാക്കി. ഇന്ത്യൻ റിഫൈനറികൾ ഇറാനിൽ നിന്ന് എണ്ണ വാങ്ങുന്നുണ്ടെന്നും വിതരണത്തിൽ തടസങ്ങളില്ലെന്നും മന്ത്രാലയം ഔദ്യോഗികമായി അറിയിച്ചു.

ഇറാനിൽ നിന്നുള്ള ഇറക്കുമതിക്ക് നിലവിൽ യാതൊരുവിധ സാമ്പത്തിക തടസങ്ങളുമില്ല. വരും മാസങ്ങളിലേക്കുള്ള എണ്ണ ലഭ്യത രാജ്യം പൂർണമായും ഉറപ്പാക്കിയിട്ടുണ്ട്. ഏപ്രിൽ 2ന് 44,000 ടൺ ഇറാനിയൻ എൽപിജിയുമായി എത്തിയ 'സീ ബേർഡ്' എന്ന കപ്പൽ മംഗളൂരു തുറമുഖത്ത് ചരക്ക് ഇറക്കിക്കൊണ്ടിരിക്കുകയാണെന്നും മന്ത്രാലയം വ്യക്തമാക്കി.

അമേരിക്ക ഉപരോധം ഏർപ്പെടുത്തിയ 'പിങ് ഷുൺ' എന്ന കപ്പൽ ഗുജറാത്തിലെ വാഡിനാറിന് പകരം ചൈനയിലേക്ക് പോയതിനെക്കുറിച്ചുള്ള വാർത്തകൾക്ക് മന്ത്രാലയം മറുപടി നൽകി. അന്താരാഷ്ട്ര എണ്ണ വ്യാപാരത്തിൽ കപ്പലുകളുടെ ലക്ഷ്യസ്ഥാനം യാത്രക്കിടയിൽ മാറ്റുന്നത് തികച്ചും സ്വാഭാവികമായ നടപടിയാണ്. വാണിജ്യപരമായ ലാഭവും സൗകര്യവും നോക്കിയാണ് കമ്പനികൾ ഇത്തരം തീരുമാനങ്ങൾ എടുക്കുന്നത്. ഇതിനെ രാഷ്ട്രീയവൽക്കരിക്കാനുള്ള നീക്കങ്ങളെ മന്ത്രാലയം നിശിതമായി വിമർശിച്ചു.

2019ൽ ട്രംപ് ഭരണകൂടം ഏർപ്പെടുത്തിയ കർശനമായ ഉപരോധത്തെത്തുടർന്ന് ഇന്ത്യ ഇറാനിൽ നിന്നുള്ള എണ്ണ ഇറക്കുമതി നിർത്തിവച്ചിരുന്നു. എന്നാൽ നിലവിലെ ആഗോള സാഹചര്യത്തിൽ ഇറാനിൽ നിന്നുള്ള എണ്ണ വാങ്ങാനുള്ള തീരുമാനം ഇന്ത്യയുടെ ഊർജ സുരക്ഷയിൽ നിർണായകമാണ്. നാല്പതിലധികം രാജ്യങ്ങളിൽ നിന്ന് ഇന്ത്യ എണ്ണ വാങ്ങുന്നുണ്ടെന്നും എവിടെ നിന്ന് വാങ്ങണമെന്ന് തീരുമാനിക്കാനുള്ള പൂർണ സ്വാതന്ത്ര്യം ഇന്ത്യൻ കമ്പനികൾക്കുണ്ടെന്നും മന്ത്രാലയം ഓർമ്മിപ്പിച്ചു.

അമേരിക്കയുടെ ഉപരോധങ്ങളെ മറികടന്ന് സ്വന്തം രാജ്യത്തിന്റെ താല്പര്യങ്ങൾ സംരക്ഷിക്കുന്ന നിലപാടാണ് ഊർജ മേഖലയിൽ രാജ്യം സ്വീകരിക്കേണ്ടത്. ഇറാനിയൻ എണ്ണയുടെ കുറഞ്ഞ വിലയും ഇന്ത്യൻ റിഫൈനറികളിലെ ഗുണമേന്മയും കണക്കിലെടുക്കുമ്പോൾ ഈ സഹകരണം തുടരുന്നത് രാജ്യത്തിന് സാമ്പത്തികമായി ഗുണകരമാകും.