മെയ് മാസത്തിൽ ഉഷ്ണതരംഗത്തിന് സാധ്യത; കാലവർഷം പകുതിയോടെ എത്തും: ഐഎംഡി

ന്യൂഡൽഹി : മെയ് മാസത്തിൽ രാജ്യത്തിന്റെ വിവിധ ഭാഗങ്ങളിൽ സാധാരണയിൽ കൂടുതൽ ഉഷ്ണതരംഗത്തിന് സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പിന്റെ മുന്നറിയിപ്പ്. ഹിമാലയൻ പർവതനിരകളുടെ താഴ്വാരങ്ങൾ, കിഴക്കൻ തീരദേശ സംസ്ഥാനങ്ങൾ, ഗുജറാത്ത്, മഹാരാഷ്ട്ര എന്നിവിടങ്ങളിലാണ് കടുത്ത ചൂടിന് സാധ്യതയുള്ളത്. വെള്ളിയാഴ്ച പുറത്തിറക്കിയ പ്രതിമാസ പ്രവചനത്തിലാണ് കാലാവസ്ഥാ വകുപ്പ് ഇക്കാര്യം വ്യക്തമാക്കിയത്.

മെയ് മാസത്തിൽ രാജ്യത്ത് ലഭിക്കുന്ന ശരാശരി മഴ സാധാരണയിൽ കൂടുതലായിരിക്കുമെന്നും റിപ്പോർട്ടുണ്ട്. കാത്തിരിക്കുന്ന തെക്കുപടിഞ്ഞാറൻ കാലവർഷം മെയ് 14നും 16നും ഇടയിലുള്ള ദിവസങ്ങളിൽ ആൻഡമാൻ നിക്കോബാർ ദ്വീപുകളിൽ എത്താൻ സാധ്യതയുണ്ടെന്ന് ഐഎംഡി ഡയറക്ടർ ജനറൽ മൃത്യുഞ്ജയ് മഹാപത്ര പറഞ്ഞു.

രാജ്യത്തിന്റെ പല ഭാഗങ്ങളിലും കുറഞ്ഞ താപനില സാധാരണയേക്കാൾ കൂടുതലായിരിക്കാനാണ് സാധ്യത. ഇന്ത്യയിലെ ചിലയിടങ്ങളിൽ മഴ കുറയാൻ സാധ്യതയുണ്ടെന്നതൊഴിച്ചാൽ രാജ്യത്തുടനീളം മികച്ച മഴ ലഭിച്ചേക്കും.

നിലവിൽ പസഫിക് സമുദ്രത്തിലെ താപനില ഉയരുന്ന എൽ നിനോ പ്രതിഭാസത്തിലേക്ക് കാലാവസ്ഥ മാറിക്കൊണ്ടിരിക്കുകയാണ്. കാലവർഷത്തിൽ എൽ നിനോ സാഹചര്യം രൂപപ്പെടാൻ സാധ്യതയുണ്ടെന്നും കാലാവസ്ഥാ വകുപ്പ് സൂചിപ്പിച്ചു. ഏപ്രിൽ മാസത്തിൽ തെക്കേ ഇന്ത്യയിലൊഴികെ രാജ്യത്തിന്റെ മിക്ക ഭാഗങ്ങളിലും താപനില സാധാരണ നിലയിലായിരുന്നു.

കഴിഞ്ഞ മാസത്തിൽ ഏഴ് പശ്ചിമ അസ്വസ്ഥതകൾ രാജ്യത്തെ ബാധിച്ചതായും കാലാവസ്ഥാ വകുപ്പ് അറിയിച്ചു. കടുത്ത ചൂടിനെ പ്രതിരോധിക്കാൻ ആവശ്യമായ മുൻകരുതലുകൾ സ്വീകരിക്കണമെന്ന് അധികൃതർ നിർദേശിച്ചു.