'കിസാൻ ബച്ചാവോ പദയാത്ര' തടഞ്ഞ് ഹരിയാന പൊലീസ്; സമാധാനപരമായി പ്രതിഷേധിച്ച് കർഷകർ

ന്യൂഡൽഹി: കര്‍ഷക സംഘടനകളുടെ നേതൃത്വത്തില്‍ ഡൽഹിയിലേക്ക് നടത്താനിരുന്ന 'കിസാൻ ബച്ചാവോ പദയാത്ര' ഹരിയാന പൊലീസ് ഖനൗരി അതിർത്തിയിൽ തടഞ്ഞു. പഞ്ചാബ്-ഹരിയാന അതിർത്തിയായ ഖനൗരി-ദാതാ സിംഗ്‌വാല മേഖലയിൽ ഹരിയാന പോലീസ് കോൺക്രീറ്റ് ബ്ലോക്കുകളും മുള്ളുവേലികളും ഉപയോഗിച്ച് ശക്തമായ ബാരിക്കേഡുകൾ തീർത്താണ് കർഷകരുടെ പദയാത്ര തടഞ്ഞത്.

തുടർന്ന് റോഡുകൾ പൂർണമായി ഉപരോധിക്കാതെ, അതിർത്തിയിലെ ഒരു വശത്ത് തമ്പടിച്ച് സമരം തുടരുമെന്നും പൊതുജനങ്ങൾക്ക് ബുദ്ധിമുട്ടുണ്ടാക്കില്ലെന്നും നേതാക്കൾ അറിയിച്ചു. പഞ്ചാബ്-ഹരിയാന അതിർത്തിയായ ഖനൗരിയിൽ നിന്ന് ഓഗസ്റ്റ് 16-ന് ആരംഭിച്ച മാർച്ച് ഓഗസ്റ്റ് 29-ന് ന്യൂഡൽഹിയിലെ ജന്തർ മന്തറിൽ എത്തിച്ചേരാനാണ് തീരുമാനിച്ചിരുന്നത്. അവിടെ കർഷക പഞ്ചായത്ത് നടത്താനായിരുന്നു കർഷകരുടെ തീരുമാനം.