അതിജീവിതയ്ക്ക് കോൺഗ്രസ് സൈബർ ആക്രമണം

തിരുവനന്തപുരം : രാഹുൽ മാങ്കൂട്ടത്തിൽ എംഎൽഎയുടെ അതിക്രൂര പീഡനത്തിന് ഇരയായ അതിജീവിതയെ വേട്ടയാടി കോൺഗ്രസിന്റെ സൈബർ ടീം. യുവതിയുടെ ചിത്രങ്ങളടക്കമുള്ള വ്യക്തി വിവരം പ്രചരിപ്പിച്ചുകൊണ്ടാണ് മുതിർന്ന കോൺഗ്രസ് നേതാക്കളുടെ ഒത്താശയോടെ സൈബർ ടീമിന്റെ ആക്രമണം . കെപിസിസി ഡിജിറ്റൽ മീഡിയ സെല്ലിൽ ഇതിനുള്ള ആഹ്വാനം നടന്നു. കെപിസിസി ഡിജിറ്റൽ മീഡിയ സെൽ പ്രചരിപ്പിച്ചത്‌ വിവാഹ ഫോട്ടോയാണെന്ന് കെപിസിസി പ്രസിഡന്റ്‌ സണ്ണി ജോസഫ്‌ സമ്മതിച്ചതോടെ ഇതിനുപിന്നിലെ ഗൂഢാലോചന പുറത്തായി.

കോൺഗ്രസുകാരുടെ സമ‍ൂഹ മാധ്യമങ്ങളിലെ പോസ്റ്റും കമന്റും നിയന്ത്രിക്കുന്ന ഇൻസ്റ്റന്റ് റെസ്പോൺസ് ടീമിന്റെ (ഐആർടി) വാട്സാപ്പ് ഗ്രൂപ്പുകളിലും ഇത് സംബന്ധിച്ച ഗൂഢാലോചന നടന്നു. അതിജീവിതയുടെ ചിത്രം ഗ്രൂപ്പിലിട്ടശേഷം അംഗങ്ങളോടെല്ലാം ഇത് പ്രചരിപ്പിക്കാൻ ആഹ്വാനം ചെയ്യുന്നുണ്ട്. ഈ ഗ്രൂപ്പിൽ കോൺഗ്രസിലെ മുതിർന്ന നേതാക്കളും അംഗമാണ്. ഇത് സംബന്ധിച്ച തെളിവ്‌ ഡോ. പി സരിൻ ഞായറാഴ്ച സമൂഹമാധ്യമങ്ങളിലൂടെ പുറത്തുവിട്ടു. ലൈംഗിക കേസുകളിലെ ഇരകളുടെ വിവരം വെളിപ്പെടുത്തുന്നത് ഗുരുതരമായ ക്രിമിനൽ കുറ്റമാണെന്നിരിക്കെ പിടിക്കപ്പെടാതിരിക്കാൻ സൈബർ അധിക്ഷേപമെന്ന് തോന്നാത്ത രീതിയിലുടെ പ്രചാരണമാണ് ഇവർ നടത്തുന്നത്. ഒന്നര വർഷം മുമ്പ് നടന്ന യുവതിയുടെ വിവാഹ ചിത്രം "വളരെ വൈകിയാണ് അറിഞ്ഞത് സുഹൃത്തിന്റെ വിവാഹം, വൈകിയാണെങ്കിലും ആംശംസകൾ' എന്ന ക്യാപ്ഷനോടെയാണ് പങ്കുവയ്ക്കുന്നത്. യുവതിയെക്കുറിച്ച് അധിക്ഷേപങ്ങൾ ഈ പോസ്റ്റിന് താഴെ കമന്റായും രേഖപ്പെടുത്തും.

ബിജെപി വിട്ട്‌ കോൺഗ്രസിലെത്തിയ സന്ദീപ്‌ വാര്യരാണ് ഫെയ്സ്ബുക്കിലൂടെ അതിജീവിതയുടെ വിവരങ്ങൾ വെളിപ്പെടുത്തും വിധം ആദ്യം കുറിപ്പെഴുതിയത്. പെൺകുട്ടിയുടെ വിവാഹ സൽക്കാരത്തിന് താൻ പങ്കെടുത്തിട്ടുണ്ടെന്നും അത് തന്റെ പ്രൊഫൈലിൽ ഉണ്ടെന്ന് അണികൾക്ക് സൂചന നൽകുന്ന വിധത്തിലായിരുന്നു കുറിപ്പ്. ഇതിന് പിന്നാലെയാണ് സന്ദീപ് വാര്യരുടെ പ്രൊഫൈലിലെ യുവതിയുടെ വിവാഹ ഫോട്ടോ കോൺഗ്രസുകാർ വ്യാപകമായി പ്രചരിപ്പിച്ചത്. തൊട്ടുപിന്നാലെ താൻ നിരപരാധിയാണെന്ന് വരുത്തി തീർക്കാൻ സന്ദീപ് വാര്യർ ഫെയ്സ്ബുക്കിൽ നിന്ന് ചിത്രം നീക്കുകയും ചെയ്തു. അതിജീവിതയുടെ വീട്ടിലേക്കും ചില കോൺഗ്രസ്, ബിജെപി അനുകൂല ഓൺലൈൻ മാധ്യമങ്ങൾ കടന്നുചെല്ലുന്നുണ്ട്. സൈബർ ആക്രമണത്തോടെ കടുത്ത മാനസിക സമ്മർദത്തിലാണിവർ.


മഹിളാ കോൺഗ്രസ്‌ ജില്ലാ സെക്രട്ടറിക്ക് 
എതിരെ ജാമ്യമില്ലാ കേസ്‌

പത്തനംതിട്ട : യൂത്ത് കോൺഗ്രസ് വനിതാ നേതാവിനെ സമൂഹമാധ്യമത്തിലൂടെ അധിക്ഷേപിച്ച മഹിളാ കോൺഗ്രസ് പത്തനംതിട്ട ജില്ലാ സെക്രട്ടറി രഞ്ജിത പുളിക്കനെതിരെ ജാമ്യമില്ലാ വകുപ്പുകൾ ചുമത്തി പൊലീസ്‌ കേസെടുത്തു. ലൈംഗികാതിക്രമകേസിലെ പ്രതി രാഹുൽ മാങ്കൂട്ടത്തിൽ എംഎൽഎയ്‌ക്കെതിരെ പ്രതികരിച്ചതിനാണ്‌ യൂത്ത് കോൺഗ്രസ്‌ സംസ്ഥാന ജനറൽ സെക്രട്ടറി സജന ബി സജനെ ഫെയ്‌സ്‌ബുക്കിലൂടെ അപമാനിച്ചത്. കഴിഞ്ഞ 27ന്‌ വീഡിയോ പ്രചരിപ്പിച്ചായിരുന്നു അപകീർത്തിപരമായ പരാമർശങ്ങൾ. തിരുവനന്തപുരം സൈബർ പൊലീസാണ്‌

കേസന്വേഷിക്കുന്നത്‌. രാഹുൽ മാങ്കൂട്ടത്തിലിനെ വെള്ളപൂശാൻ കഴിഞ്ഞദിവസം മഹിളാ കോൺഗ്രസ്‌ പത്തനംതിട്ട ജില്ലാ ജനറൽ സെക്രട്ടറി ബിന്ദു ബിനു ഇരയെ സമൂഹമാധ്യമത്തിലൂടെ അപമാനിച്ചിരുന്നു.