'കോടതിയിൽ ജോലി വാങ്ങി തരാം': 25 കോടിയുടെ തട്ടിപ്പ്, ദമ്പതികൾ പിടിയിൽ

ബം​ഗളൂരു: കോടതിയിൽ ജോലിവാങ്ങി തരാമെന്ന് വാ​ഗ്ദാനം ചെയ്ത് പണം തട്ടിയ കേസിൽ ദമ്പതികൾ പിടിയിൽ. ജേസൺ ഡിസൂസ, ലവീന എന്നിവരെയാണ് സെൻട്രൽ ക്രൈം ബ്രാഞ്ച് (സിസിബി) അറസ്റ്റ് ചെയ്തത്. തൊഴിൽരഹിതരെയും സ്വകാര്യ മേഖലയിലെ ജീവനക്കാരെയും ലക്ഷ്യമിട്ടായിരുന്നു തട്ടിപ്പ്. സർക്കാർ ജോലി വാ​ഗ്ദാനത്തിലൂടെ ഇവർ നൂറുകണക്കിന് ഉദ്യോഗാർഥികളിൽ നിന്നായി 25 കോടി രൂപ തട്ടിയതായി പൊലീസ് പറയുന്നു.

ഉദ്യോ​ഗാർഥികളെ നിരവധി ഏജന്റുമാർ വഴിയാണ് ദമ്പതികൾ വലയിലാക്കിയത്. തട്ടിപ്പിനിരയായ ഓരോ ഉദ്യോ​ഗാർഥികളിൽ നിന്നും ഇവർ 10 മുതൽ 25 ലക്ഷം വരെ കൈക്കലാക്കി. കോടതികളിലെ ഡി ​ഗ്രൂപ്പ് ജോലികൾ വാങ്ങി നൽകാമെന്നായിരുന്നു ദമ്പതികളുടെ ഉറപ്പ്. വാ​ഗ്ദാനങ്ങൾ വിശ്വസിനീയമാക്കാൻ ജഡ്ജിമാരുടെ വ്യാജ ഒപ്പുകൾ ഉണ്ടാക്കുകയും അപേക്ഷകരെ ബോധ്യപ്പെടുത്താൻ വ്യാജ നിയമന ഉത്തരവുകൾ നൽകുകയും ചെയ്തു.

എന്നാൽ പണം വാങ്ങിയതിന് ശേഷം ജോലിയെക്കുറിച്ച് ചോദിച്ചപ്പോൾ ദമ്പതികൾ ഒഴിവുകഴിവുകൾ പറഞ്ഞ് മുങ്ങി. പറ്റിക്കപ്പെട്ടെന്ന് മനസിലായതോട ചില ഉദ്യോ​ഗാർഥികൾ സിസിബിയിൽ പരാതി നൽകി. ബം​ഗളൂരു പൊലീസ് സ്റ്റേഷനിലും കേസ് രജിസ്റ്റർ ചെയ്തിട്ടുണ്ട്. 2024 ജോലി തട്ടിപ്പ് കേസിൽ ദമ്പതികൾ മുമ്പും അറസ്റ്റിലായിട്ടുണ്ട്. പുറത്തിറങ്ങിയതിന് ശേഷവും ഇവർ സമാന കുറ്റകൃത്യങ്ങൾ തുടരുകയായിരുന്നു.