ഡൽഹിയിൽ പുകമഞ്ഞ്; വായു ​ഗുണനിലവാരം '​ഗുരുതരാ'വസ്ഥയിൽ

ന്യൂഡൽഹി : തിങ്കളാഴ്ച പകൽ ഡൽഹിയുടെ പല ഭാ​ഗങ്ങളിലും കനത്ത പുകമഞ്ഞ് മൂടിയതായി കാലാവസ്ഥാ വകുപ്പ് വ്യക്തമാക്കി. വായു ഗുണനിലവാര സൂചിക (AQI) 'ഗുരുതര' വിഭാഗത്തിൽ തുടരുന്നതായി സമീർ ആപ്പ് പ്രകാരമുള്ള കണക്കുകൾ വ്യക്തമാക്കി. 417 ആണ് എക്യൂഐ. 25 സ്റ്റേഷനുകളിൽ വായുവിന്റെ ഗുണനിലവാരം 'ഗുരുതര'മെന്നും 14 സ്റ്റേഷനുകളിൽ 'വളരെ മോശം' എന്നും രേഖപ്പെടുത്തി.

കേന്ദ്ര മലിനീകരണ നിയന്ത്രണ ബോർഡിന്റെ (സിപിസിബി) സമീർ ആപ്പ് പ്രകാരം, 474 എക്യൂഐ രേഖപ്പെടുത്തിയ വസീർപൂരിലാണ് ഏറ്റവും മോശം വായു ഗുണനിലവാരം. സിപിസിബിയുടെ കണക്കനുസരിച്ച്, 0 നും 50 നും ഇടയിലുള്ള എക്യൂഐ 'നല്ലത്' എന്നും, 51 മുതൽ 100 ​​വരെ 'തൃപ്തികരം' എന്നും, 101 മുതൽ 200 വരെ 'മിതമായത്' എന്നും, 201 മുതൽ 300 വരെ 'മോശം' എന്നും, 301 മുതൽ 400 വരെ 'വളരെ മോശം' എന്നും, 401 മുതൽ 500 വരെ 'ഗുരുതരം' എന്നും കണക്കാക്കപ്പെടുന്നു.

അടുത്ത രണ്ട് ദിവസത്തേക്ക് ഡൽഹിയിലെ വായുവിന്റെ ഗുണനിലവാരം 'വളരെ മോശം' മുതൽ 'തീവ്രം' വരെയുള്ള വിഭാഗങ്ങളിൽ തുടരാൻ സാധ്യതയുണ്ട്. തുടർന്നുള്ള ആറ് ദിവസത്തേക്ക് വായുവിന്റെ ഗുണനിലവാരം 'വളരെ മോശം' നിലയിൽ ആയിരിക്കുമെന്ന് എയർ ക്വാളിറ്റി ഏർലി വാണിംഗ് സിസ്റ്റം (AQEWS) പറഞ്ഞു.

കൂടിയ താപനില 23-25 ​​ഡിഗ്രി സെൽഷ്യസിനും കുറഞ്ഞ താപനില 6-8 ഡിഗ്രി സെൽഷ്യസിനും ഇടയിലായിരിക്കുമെന്ന് പ്രതീക്ഷിക്കുന്നതായും കാലാവസ്ഥ വകുപ്പ് പറഞ്ഞു.