ഗൾഫ് മേഖലയിലേക്കുള്ള വിമാന സർവീസുകൾ പുനരാരംഭിക്കുന്നു; എയർ ഇന്ത്യ ഇന്ന് 48 സർവീസുകൾ നടത്തും

ന്യൂഡൽഹി: പശ്ചിമേഷ്യയിലെ യുദ്ധസാഹചര്യത്തെത്തുടർന്ന് നിർത്തിവെച്ചിരുന്ന വിമാന സർവീസുകൾ എയർ ഇന്ത്യ ഭാഗികമായി പുനരാരംഭിക്കുന്നു. വ്യാഴാഴ്ച (മാർച്ച് 19) ഗൾഫ് മേഖലയിലേക്ക് എയർ ഇന്ത്യയും എയർ ഇന്ത്യ എക്സ്പ്രസും ചേർന്ന് ആകെ 48 സർവീസുകൾ നടത്തുമെന്ന് അധികൃതർ അറിയിച്ചു.

ഇതിൽ 16 ഷെഡ്യൂൾഡ് സർവീസുകളും 32 നോൺ-ഷെഡ്യൂൾഡ് സർവീസുകളും ഉൾപ്പെടുന്നു. ദുബായിലേക്കുള്ള സർവീസുകൾ ബുധനാഴ്ച വൈകുന്നേരത്തോടെ തന്നെ പുനരാരംഭിച്ചിട്ടുണ്ട്. ദുബായ് സിവിൽ ഏവിയേഷൻ അതോറിറ്റിയുടെ നിർദ്ദേശാനുസരണം വൈകുന്നേരം 4 മണി മുതൽ (ദുബായ് സമയം) സർവീസുകൾ സാധാരണ നിലയിലായതായി ഇൻഡിഗോയും അറിയിച്ചു.

അതേസമയം, മേഖലയിലെ സുരക്ഷാ സാഹചര്യം വിലയിരുത്തിയ ശേഷം മാത്രമേ എല്ലാ നഗരങ്ങളിലേക്കുമുള്ള സർവീസുകൾ പൂർണ്ണതോതിൽ പുനരാരംഭിക്കൂ എന്ന് ആകാശ എയർ വ്യക്തമാക്കി. റിയാദ്, മുംബൈ സർവീസുകൾ ഇന്ന് മുതൽ ആരംഭിക്കും. എന്നാൽ അബുദാബി, ദോഹ, കുവൈറ്റ് എന്നിവിടങ്ങളിലേക്കുള്ള സർവീസുകൾ മാർച്ച് 21 വരെ നിർത്തിവെച്ചിരിക്കുകയാണ്.

ഫെബ്രുവരി 28-ന് പശ്ചിമേഷ്യയിൽ സംഘർഷം ആരംഭിച്ചതിന് ശേഷം ഇതുവരെ ഏകദേശം 2.6 ലക്ഷം ഇന്ത്യക്കാർ ഗൾഫ് രാജ്യങ്ങളിൽ നിന്ന് നാട്ടിലേക്ക് മടങ്ങിയെത്തിയതായാണ് കണക്കുകൾ. വ്യോമപാതയിലെ നിയന്ത്രണങ്ങൾ കാരണം പല വിമാനങ്ങളും വഴിതിരിച്ചുവിട്ടാണ് നിലവിൽ സർവീസ് നടത്തുന്നത്.