ദുരന്തത്തിൽപ്പെട്ടവരുടെ കുടുംബങ്ങൾക്കായി 500 കോടിയുടെ വെൽഫെയർ ട്രസ്റ്റ് രൂപീകരിച്ച് ടാറ്റ ​ഗ്രൂപ്

മുംബൈ: അഹമ്മദാബാദ് വിമാനാപകടത്തിൽപ്പെട്ടവരുടെ കുടുംബങ്ങൾക്കായി 500 കോടിയുടെ വെൽഫെയർ ട്രസ്റ്റ് രൂപീകരിച്ച് ടാറ്റ ​ഗ്രൂപ്. വെള്ളിയാഴ്ചയാണ് ടാറ്റ പ്രഖ്യാപനം നടത്തിയത്. AI-171 മെമ്മോറിയൽ ആൻഡ് വെൽഫെയർ ട്രസ്റ്റ് എന്ന പേരിൽ മുംബൈയിലാണ് ട്രസ്റ്റ് രജിസ്റ്റർ ചെയ്തിരിക്കുന്നത്.

അപകടത്തിൽ മരിച്ചവരുടെ കുടുംബങ്ങൾക്ക് നൽകുന്ന 1 കോടി ധനസഹായം ഉൾപ്പെടെയുള്ള പ്രവർത്തനങ്ങൾക്കായാണ് ട്രസ്റ്റ് രൂപീകരിച്ചിരിക്കുന്നത്. ടാറ്റ സൺസും ടാറ്റ ട്രസ്റ്റുകളും 250 കോടി വീതം ട്രസ്റ്റിന് നൽകും.

അപകടത്തിൽ ഗുരുതരമായി പരിക്കേറ്റവരുടെ ചികിത്സ, അപകടത്തിൽ തകർന്ന ബി ജെ മെഡിക്കൽ കോളേജ് ഹോസ്റ്റലിന്റെ അടിസ്ഥാന സൗകര്യങ്ങൾ പുനർനിർമ്മിക്കുന്നതിനുള്ള സാമ്പത്തിക സഹായം എന്നിവയ്ക്കും ട്രസ്റ്റ് നേതൃത്വം നൽകും. ടാറ്റ സൺസിന്റെ ജനറൽ കൗൺസിലായ സിദ്ധാർത്ഥ് ശർമ്മ, എസ്‌ പത്മനാഭൻ എന്നിവരെ ബോർഡിന്റെ പ്രാരംഭ ട്രസ്റ്റിമാരായി നിയമിച്ചു. കൂടുതൽ ട്രസ്റ്റികളെ ഉടൻ നിയമിക്കുമെന്ന് പ്രസ്താവനയിൽ പറയുന്നു.

ജൂൺ 12 ന് അഹമ്മദാബാദിൽ നിന്ന് ലണ്ടനിലേക്ക് പോയ എയർ ഇന്ത്യ വിമാനം പറന്നുയർന്ന ഉടൻ തകർന്നുവീണാണ് അപകടം. ബി ജെ മെഡിക്കൽ കോളേജിലെ 19 പേർ ഉൾപ്പെടെ 260 പേർ മരിച്ചു. വിമാനത്തിലെ ഒരു യാത്രക്കാരൻ ഒഴികെ എല്ലാവരും കൊല്ലപ്പെട്ടിരുന്നു.