2030 കോമൺവെൽത്ത് ഗെയിംസ് ഇന്ത്യയിൽ; അഹമ്മദാബാദ് വേദിയാകും

ന്യൂഡൽഹി: 2030ലെ കോമൺവെൽത്ത് ഗെയിംസിന് അഹമ്മദാബാദ് വേദിയാകും. രണ്ട് പതിറ്റാണ്ടിന് ശേഷമാണ് ഇന്ത്യ കോമൺവെൽത്തിന് വേദിയാകുന്നത്. 2010-ൽ ന്യൂഡൽഹിയിലായിരുന്നു ഇതിനുമുമ്പ് ഇന്ത്യ ഗെയിംസിന് വേദിയായത്. സ്‌കോട്ട്‌ലൻഡ്‌ നഗരമായ ​ഗ്ലാസ്​ഗോയിലാണ് പ്രഖ്യാപനം നടന്നത്.

ഗ്ലാസ്‌ഗോയിൽ നടന്ന കോമൺവെൽത്ത് സ്പോർട്ട് ജനറൽ അസംബ്ലിയിൽ 74 കോമൺവെൽത്ത് അംഗരാജ്യങ്ങളുടെ പ്രതിനിധികളാണ് ഇന്ത്യയുടെ അപേക്ഷ അംഗീകരിച്ചത്.

കോമൺവെൽത്ത് സ്പോർട്ട് ഞങ്ങളിൽ അർപ്പിച്ച വിശ്വാസത്തിന് അത്യധികം കടപ്പെട്ടിരിക്കുന്നു. 2030ലെ ഗെയിംസ്, കോമൺവെൽത്ത് പ്രസ്ഥാനത്തിൻ്റെ നൂറാം വാർഷികം ആഘോഷിക്കുക മാത്രമല്ല, അടുത്ത നൂറ്റാണ്ടിന് അടിത്തറയിടുകയും ചെയ്യും. ഇത് സൗഹൃദത്തിൻ്റെയും പുരോഗതിയുടെയും മനോഭാവത്തിൽ കോമൺവെൽത്തിലെ കായികതാരങ്ങളെയും സമൂഹങ്ങളെയും സംസ്കാരങ്ങളെയും ഒരുമിപ്പിക്കും. ഇന്ത്യൻ കോമൺവെൽത്ത് ഗെയിംസ് അസോസിയേഷൻ പ്രസിഡൻ്റ് പി ടി ഉഷ പ്രതികരിച്ചു.