ഗുജറാത്തില്‍ ബുൾഡോസര്‍രാജ്; നൂറ്റാണ്ടുകള്‍ പഴക്കമുള്ള 
ദര്‍​ഗയും മസ്ജിദും ഇടിച്ചുനിരത്തി

അഹമ്മ​ദാബാദ്
സര്‍ക്കാര്‍ ഭൂമി കൈയേറിയെന്ന് ആരോപിച്ച് ​ഗുജറാത്തിലെ ​ഗിര്‍ സോമനാഥ് ജില്ലയില്‍ സോമനാഥ ക്ഷേത്രത്തിന് സമീപ പ്രദേശത്തെ നൂറ്റാണ്ടുകള്‍ പഴക്കമുള്ള ദര്‍​ഗയും മസ്ജിദും ഖബര്‍സ്ഥാനും ബുൾഡോസർ ഉപയോഗിച്ച്‌ പൊളിച്ചുനീക്കി. ബുള്‍ഡോസര്‍ രാജ് അവസാനിപ്പിക്കണമെന്ന സുപ്രീംകോടതി ഉത്തരവ് നിലനിൽക്കെയാണ് സംരക്ഷിത സ്മാരകമടക്കമുള്ളവ ഗുജറാത്തിലെ ബിജെപി സര്‍ക്കാര്‍ പൊളിച്ചുനീക്കിയത്.

വെരാവലിലെ പ്രഭാസ് പട്ടാനിലാണ് 58 ബുള്‍ഡോസറുകള്‍, 52 ട്രാക്ടറുകള്‍, ക്രെയിനുകള്‍ തുടങ്ങിയവ ഉപയോ​ഗിച്ച് ശനിയാഴ്ച പുലര്‍ച്ചെ മുതല്‍ "കൈയേറ്റമൊഴിപ്പിക്കല്‍' തുടങ്ങിയത്. മസ്ജിദുകളും ദര്‍​ഗകളും ഉള്‍പ്പെടെ ഒൻപത്‌ ആരാധനാലയങ്ങൾ പൊളിച്ചുനീക്കി . 1200‌ വര്‍ഷം പഴക്കമുള്ള സംരക്ഷിതസ്മാരകമായ  ദര്‍​​ഗ ഇടിച്ചുനിരത്തിയതായി അഭിഭാഷകനായ അനസ് തൻവീര്‍ സമൂഹമാധ്യമത്തിലെ പോസ്റ്റിൽ പറഞ്ഞു. പൊളിക്കലിന്റെ വീഡിയോയും അദ്ദേഹം പുറത്തുവിട്ടു. ഹാജി മംഗറോള്‍ ദര്‍​ഗ, ഷാ സിലര്‍ ദര്‍​ഗ, ​ഗരിബ് ഷാ ദര്‍​ഗ, ജാഫര്‍ മുസാഫര്‍ ദര്‍​ഗ എന്നിവ പൊളിച്ചുനീക്കിയതിനെതിരെ നടപടി ആവശ്യപ്പെട്ട്  ​ഗുജറാത്ത് ന്യൂനപക്ഷ ഏകോപന സമിതിയും മുഖ്യമന്ത്രി ഭുപേന്ദ്ര പട്ടേലിന് കത്തയച്ചു.

​സംസ്ഥാന റിസര്‍വ് പൊലീസിലെ 788 ഉദ്യോ​ഗസ്ഥര്‍, മൂന്ന്‌ എസ്‌പിമാര്‍, നാല് ഡെപ്യൂട്ടി സൂപ്രണ്ടുമാര്‍, 12 ഇന്‍സ്‌പെക്‌ടര്‍മാര്‍, 24 സബ് ഇന്‍സ്‌പെക്‌ടര്‍മാര്‍, എ‍ഡിഎം തുടങ്ങിയവരുടെ സാന്നിധ്യത്തിലായായിരുന്നു പൊളിക്കല്‍. 135 പേരെ കസ്റ്റഡിയിലും എടുത്തു. 60 കോടി മൂല്യമുള്ള 15 ഹെക്ടര്‍ ഭൂമി തിരിച്ചുപിടിച്ചതായി അധികൃതര്‍ അവകാശപ്പെട്ടു.