പത്തനംതിട്ടയിൽ യുവതിയെ ഭർത്താവ് കുത്തി പരിക്കേൽപ്പിച്ചു

പത്തനംതിട്ട: പത്തനംതിട്ട കൊടുമൺ ഐയ്ക്കാട് യുവതിയെ ഭർത്താവ് കുത്തിപ്പരിക്കേൽപ്പിച്ചു. പന്തളം വെട്ടിയാർ സ്വദേശി വിജയ സോണി (35) ക്കാണ് കുത്തേറ്റത്. യുവതിയെ പന്തളത്തുള്ള സ്വകാര്യ ആശുപത്രിയിൽ പ്രവേശിപ്പിച്ചു. കൊടുമണ്ണിൽ വാടകയ്ക്ക് താമസിക്കുന്ന സന്തോഷ്, ദീനാമ്മ ദമ്പതികൾ വാടകയ്ക്ക് താമസിക്കുന്ന വീട്ടിൽ വെച്ചാണ് രാവിലെ സംഭവമുണ്ടായത്. അവരോടൊപ്പം താമസിക്കുന്ന സ്ത്രീയാണിതെന്ന് താമസക്കാർ പറഞ്ഞു. രാവിലെ കാപ്പി കുടിച്ചു കൊണ്ടിരുന്നപ്പോൾ വീട്ടിലെത്തിയ ആൾ കത്തി കാണിച്ച് വീട്ടുകാരെ ഭയപ്പെടുത്തി യുവതിയെ മുറിയ്ക്ക് പുറത്തിറക്കി കുത്തിപ്പരിക്കേൽപ്പിച്ചതായിട്ടാണ് വാടകക്കാരിയായ ദീനാമ്മ പറയുന്നത്.

വീടിന്റെ പുറത്തെച്ചുവരുകളിൽ രണ്ടുമൂന്ന് സ്ഥലത്ത് രക്തപ്പാടുകൾ ഉണ്ട്. തറയിൽ സ്ത്രീയുടെ മുടിയുടെ ഭാഗങ്ങൾ കിടക്കുന്നതായും കാണാം. പൊട്ടിയ ജനൽപ്പാളികളും തറയിൽ ചിതറിക്കിടക്കുന്നുണ്ട്. സ്ത്രീക്കു നേരെ വലിയ തോതിലുള്ള അക്രമം നടന്നതിന്റെ സൂചനകളുണ്ട്‌.

നിലവിളിയും ആക്രോശവും കേട്ടാണ് നാട്ടുകാർ ഓടിയെത്തിയത്. അവർ വിവരമറിയിച്ചതിനെത്തുടർന്ന് കൊടുമൺ പൊലീസ് സ്ഥലത്തെത്തിയത്. പൊലീസ് എത്തിയപ്പോഴേക്കും കുത്തിയ ആൾ തന്നെ യുവതിയെ കാറിൽക്കയറ്റി പന്തളത്തുള്ള സ്വകാര്യ ആശുപത്രിയിൽ എത്തിച്ചിരുന്നു. പ്രതിയെ പിന്നീട് പൊലീസ് കസ്റ്റഡിയിലെടുത്തു. കോട്ടയം സ്വദേശിയായ വിപിൻ തോമസ് എന്നയാളാണ് യുവതിയെ കുത്തിയത്. ഭർത്താവാണെന്ന് പറയപ്പെടുന്നു. പൊലീസ് സ്ഥിരീകരിച്ചിട്ടില്ല.