print edition വോട്ടർപ്പട്ടിക തീവ്ര പുനഃപരിശോധന: കണ്ടെത്താൻ കഴിയാത്തവർക്കായി അധിക സമയം- സിഇഒ

തിരുവനന്തപുരം: വോട്ടർപ്പട്ടിക തീവ്ര പുനഃപരിശോധന (എസ്‌ഐആർ)യിൽ നീട്ടിയ സമയപരിധി, കണ്ടെത്താൻ കഴിയാത്തവരെ അന്വേഷിച്ച്‌ കരട്‌ പട്ടികയിൽ ഉൾപ്പെടുത്താൻ പ്രയോജനപ്പെടുത്തുമെന്ന്‌ സംസ്ഥാന മുഖ്യ തെരഞ്ഞെടുപ്പ്‌ ഓഫീസർ രത്തൻ യു കേൽക്കർ വാർത്താസമ്മേളനത്തിൽ അറിയിച്ചു. ഇതുവരെയുള്ള വിവരമനുസരിച്ച്‌ പത്ത്‌ ലക്ഷം പേർ പുറത്തുപോകുമെന്നാണ്‌ കണക്കാക്കുന്നത്‌. മരിച്ചവർ, സ്ഥിരമായി താമസം മാറിയവർ, കണ്ടെത്താനാകാത്തവർ, ആൾറെഡി എൻറോൾഡ്‌ എന്ന്‌ അറിയിച്ചവർ, എന്യൂമറേഷൻ ഫോം തിരികെ നൽകാത്തവർ എന്നിവരാണിത്‌. അധികമായി ലഭിച്ച ഒരാഴ്‌ച തിരികെ ലഭിക്കാത്ത ഫോം വാങ്ങുന്നതിനായും ശ്രദ്ധനൽകും. നഗരങ്ങളിലാണ്‌ കൂടുതൽ പേരും ഫോം മടക്കി നൽകാത്തത്‌.

ബൂത്ത്‌ അടിസ്ഥാനത്തിൽ ബിഎൽഒമാരുടെ യോഗം നടത്തും. യോഗത്തിൽ ബൂത്ത്‌ ലെവൽ ഏജന്റുമാർക്ക്‌ ആരെയെങ്കിലും വിട്ടുപോകുകയോ അനർഹരായവരെ ഉൾപ്പെടുത്തുകയോ ചെയ്‌തിട്ടുണ്ടെങ്കിൽ അറിയിക്കാം. 2002ലെ വോട്ടർപട്ടികയിലെ വിവരങ്ങൾ ചിലർക്ക്‌ ലഭിച്ചിട്ടില്ല. അവരുടെ വിവരങ്ങൾ കണ്ടെത്താനും നീട്ടിക്കിട്ടിയ സമയം പ്രയോജനപ്പെടുത്തും. പുതിയ വോട്ടർമാരെ ചേർക്കാനുള്ള ഡ്രൈവ്‌ സംഘടിപ്പിക്കും. ഡിജിറ്റൈസേഷൻ 100 ശതമാനം പൂർത്തിയായിടത്ത്‌ ബിഎൽഒമാർക്ക്‌ പേര്‌ ചേർക്കുന്നതിനുള്ള ഫോം 6 പൂരിപ്പിച്ച്‌ വാങ്ങാം.

കരട്‌ പട്ടിക പ്രസിദ്ധീകരിച്ച ശേഷമാകും ഇവരെ പരിഗണിക്കുകയെന്നും മുഖ്യതെരഞ്ഞെടുപ്പ്‌ ഓഫീസർ പറഞ്ഞു. കൃത്യമായ ട്രാക്കിലായിരുന്നു കേരളത്തിലെ എസ്‌ഐആർ നടപടികൾ. സമയം നീട്ടിക്കിട്ടിയില്ലെങ്കിലും പൂർത്തികരിക്കാനാകുമായിരുന്നു. ഒരു അപ്പീൽ പോലും ഇല്ലാതെ എല്ലാവർക്കും അംഗീകരിക്കാൻ കഴിയുന്ന തരത്തിലാണ്‌ പ്രവർത്തനമെന്നും അദ്ദേഹം പറഞ്ഞു. ​