വിജിലൻസ് പരിശോധന; റീജിയണൽ ഫയർ ഓഫീസറിൽ നിന്നും കണക്കിൽപ്പെടാത്ത പണം പിടിച്ചെടുത്തു

പാലക്കാട് : വിജിലൻസിന്റെ മിന്നൽ പരിശോധനയിൽ റീജിയണൽ ഫയർ ഓഫീസറുടെ കൈയ്യിൽ നിന്നും കണക്കിൽപ്പെടാത്ത പണം പിടിച്ചെടുത്തു. പാലക്കാട്, മലപ്പുറം, തൃശ്ശൂർ ജില്ലകളുടെ ചുമതലയുള്ള പാലക്കാട് റീജിയണൽ ഫയർ ഓഫീസിലെ റീജിയണൽ ഫയർ ഓഫീസറിൽ നിന്നാണ് കണക്കിൽപ്പെടാത്ത 13,590 രൂപ വിജിലൻസ് സംഘം പിടിച്ചെടുത്തത്. ഫയർ എൻഒസി നൽകുന്നതിന് ഏജൻസികൾ മുഖേന വ്യാപകമായി ഓഫീസർ വൻ തുകകൾ കൈക്കൂലി കൈപ്പറ്റുന്നതായി വിജിലൻസിന് രഹസ്യ വിവരം ലഭിച്ചിരുന്നു. ഈ വിവരത്തിന്റെ അടിസ്ഥാനത്തിൽ വിജിലൻസ് ഇന്ന് പാലക്കാടുള്ള റീജിയണൽ ഫയർ ഓഫീസറുടെ കാര്യാലയത്തിൽ നടത്തിയ മിന്നൽ പരിശോധനയിലാണ് പണം പിടിച്ചെടുത്തത്.

പൊതുജനങ്ങളുടെ ശ്രദ്ധയിൽ അഴിമതി സംബന്ധിച്ച വിവരങ്ങൾ ലഭിക്കുകയാണെങ്കിൽ വിജിലൻസിന്റെ ടോൾ ഫ്രീ നമ്പരായ 1064 എന്ന നമ്പരിലോ 8592900900 എന്ന നമ്പരിലോ വാട്സാപ്പ് നമ്പരായ 9447789100 എന്ന നമ്പരിലോ അറിയിക്കണമെന്ന് വിജിലൻസ് ഡയറക്ടർ മനോജ് എബ്രഹാം അറിയിച്ചു.