പാറശാലയില്‍ ട്രെയിൻ പാളം തെറ്റി; ആര്‍ക്കും പരിക്കില്ല, നിരവധി ‌‌ട്രെയിനുകള്‍ വൈകിയോ‌ടും

തിരുവനന്തപുരം: തിരുവനന്തപുരം പാറശാലയിൽ റെയിൽവേ ട്രാക്കിലേക്ക് മണ്ണിടിഞ്ഞുവീണ് ട്രെയിൻ എഞ്ചിൻ പാളം തെറ്റി. ബിലാസ്പൂർ-തിരുനെൽവേലി എക്സ്പ്രസ് ട്രെയിനാണ് അപകടത്തിൽപ്പെട്ടത്. എഞ്ചിന്റെ നാല് വീലുകൾ ട്രാക്കിൽ നിന്ന് തെന്നിമാറി.

വ്യാഴാഴ്ച പു​ല​ർ​ച്ചെ ര​ണ്ടോ​ടെയാണ് അപകടമുണ്ടായത്. ഇന്നലെ പെയ്ത കനത്ത മഴയിൽ ട്രാക്കിലേക്ക് മണ്ണിടിഞ്ഞ് വീണിരുന്നു. ഇതിനെ തുടർന്നാണ് അപക‌മുണ്ടായത്. അതേസമയം, അപകടത്തിൽ ആർക്കും പരിക്കില്ല. മണ്ണ് നീക്കാനുള്ള ശ്രമം തുടരുകയാണ്. തിരുവനന്തപുരം-നാഗർകോവിൽ റൂട്ടിൽ ട്രെയിൻ ഗതാഗതം തടസ്സപ്പെട്ടു.

പരശുറാം എക്സ്പ്രസ്സ്‌ ഉൾപ്പെടെ വൈകുമെന്നാണ് സൂചന. മൂന്ന് ട്രെയിനുകൾ പിടിച്ചിട്ടിരിക്കുകയാണ്. താംബരം–തിരുവനന്തപുരം സെൻട്രൽ സ്പെഷ്യൽ ട്രെയിൻ (06163), മധുര-പുനലൂർ എക്സ്പ്രസ് (16729), താംബരം–തിരുവനന്തപുരം സെൻട്രൽ അമൃത് ഭാരത് എക്സ്പ്രസ് (16121) എന്നീ ട്രെയിനുകളാണ് പിടിച്ചിട്ടിരിക്കുന്നത്. നിലവധി ട്രെയിനുകൾ വൈകുമെന്നും റെയിൽവേ അധികൃതർ അറിയിച്ചു.