അതിജീവിതയുടെ ചിത്രം പ്രചരിപ്പിച്ചത് ‘സില്ലി മാറ്ററെ’ന്ന്‌ സണ്ണി ജോസഫ്‌

പാലക്കാട്‌ : രാഹുൽ മാങ്കൂട്ടത്തിൽ എംഎൽഎയ്ക്കെതിരെ ഗുരുതര ലൈംഗിക പീഡന പരാതി നൽകിയ അതിജീവിതയുടെ ചിത്രം കോൺഗ്രസ് ഡിജിറ്റൽ മീഡിയ പ്രചരിപ്പിച്ചത്‌ ‘സില്ലി മാറ്ററെ’ന്ന്‌ കെപിസിസി പ്രസിഡന്റ് സണ്ണി ജോസഫ്‌. ആരോ നേരത്തെ ഫെയ്സ്ബുക്കിലിട്ട വിവാഹ ചിത്രമാണ് പ്രചരിപ്പിച്ചത്‌. പുതുതായി മറ്റൊന്നും വന്നതായി ശ്രദ്ധയിൽപ്പെട്ടിട്ടില്ല.

അത്‌ പരാതിക്കാരിയുടെ ചിത്രം ആണോ എന്നറിയില്ല. കല്യാണത്തിന്റെ ചിത്രം എടുത്താൽ ഫെയ്സ്ബുക്കിലിടും. അത്രയേ ഉണ്ടായിട്ടുള്ളൂ. ഇത്‌ സംബന്ധിച്ച്‌ പരാതി ലഭിച്ചിട്ടില്ല. പരാതി വന്നാൽ ആലോചിക്കും. രാജ്‌മോഹൻ ഉണ്ണിത്താൻ പറഞ്ഞത്‌ ശ്രദ്ധിച്ചിട്ടില്ല. രാഹുലിനെതിരെ കൂടുതൽ നടപടിയുണ്ടാകില്ല. എംഎൽഎ സ്ഥാനത്തുനിന്ന്‌ അയോഗ്യനാക്കേണ്ടത്‌ സ്‌പ‍ീക്കറാണ്‌ – പ്രസ്‌ ക്ലബ്ബിൽ മീറ്റ്‌ ദ ലീഡർ പരിപാടിയിൽ സണ്ണിജോസഫ്‌ പറഞ്ഞു.