വിദ്യാർഥികൾക്കായി പ്രത്യേക വിനോദയാത്രാ പാക്കേജ്; 'വിജ്ഞാന ദർശിനി'യുമായി കെഎസ്ആർടിസി

തിരുവനന്തപുരം : സ്കൂൾ, കോളേജ് വിദ്യാർഥികൾക്കായി കുറഞ്ഞ ചെലവിൽ പ്രത്യേക വിനോദയാത്രാ പാക്കേജായ 'വിജ്ഞാന ദർശിനി' പ്രഖ്യാപിച്ച് കെഎസ്ആർടിസി.

ഗതാഗത മന്ത്രിയുടെ നിർദേശപ്രകാരം കെഎസ്ആർടിസി ബജറ്റ് ടൂറിസം സെല്ലിന്റെ നേതൃത്വത്തിലാണ് പദ്ധതി നടപ്പാക്കുന്നത്. സാംസ്കാരിക കേന്ദ്രങ്ങൾ, പുരാവസ്തു കേന്ദ്രങ്ങൾ, ഫാക്ടറികൾ, വിനോദസഞ്ചാര കേന്ദ്രങ്ങൾ എന്നിവ സന്ദർശിച്ച് വിദ്യാർഥികൾക്ക് പ്രായോഗിക അറിവ് നൽകുകയാണ് ലക്ഷ്യം.

ആദ്യഘട്ടത്തിൽ തിരുവനന്തപുരം ജില്ലയിലെ പ്രധാന വിനോദസഞ്ചാര കേന്ദ്രമായ പൊന്മുടി, കാപ്പുകാട് ആനവളർത്തൽ കേന്ദ്രം, നെയ്യാർ ഡാം, പാലോട് ബൊട്ടാണിക്കൽ ഗാർഡൻ, വിതുരയിലെ ജേഴ്സി ഫാം, മ്യൂസിയം, പ്ലാനറ്റേറിയം തുടങ്ങിയവ ഉൾപ്പെടുത്തിയാണ് യാത്രകൾ ക്രമീകരിച്ചിരിക്കുന്നത്. മറ്റ് ജില്ലകളിലും പദ്ധതി ഉടൻ നടപ്പാക്കും. വ്യവസായ ശാലകളിലേക്കുള്ള പഠനയാത്രകളും ഒരുക്കുന്നുണ്ട്. പൊന്മുടി യാത്രയ്ക്ക് അനുയോജ്യമായ പ്രത്യേക ബസുകളാണ് സർവീസിന് ഉപയോഗിക്കുന്നത്. ഒരു ബസിൽ ഒരേസമയം 36 വിദ്യാർഥികൾക്ക് യാത്ര ചെയ്യാം.

​കൂടുതൽ വിവരങ്ങൾക്കും ബുക്കിങ്ങിനുമായി കെഎസ്ആർടിസി ബജറ്റ് ടൂറിസം സെൽ ജില്ലാ കോ-ഓർഡിനേറ്റർമാരുമായി ബന്ധപ്പെടാം. ഫോൺ നമ്പരുകൾ: തിരുവനന്തപുരം നോർത്ത്- 9188619378, തിരുവനന്തപുരം സൗത്ത്- 9188938522, കൊല്ലം- 9188938523, പത്തനംതിട്ട- 9188938524, ആലപ്പുഴ- 9188938525, കോട്ടയം- 9188938526, ഇടുക്കി- 9188938527, എറണാകുളം- 9188938528, തൃശൂർ- 9188938529, പാലക്കാട്- 9188938530, മലപ്പുറം- 9188938531, കോഴിക്കോട്- 9188938532, വയനാട്- 9188938533, കണ്ണൂർ, കാസർകോട്- 9188938534.