ആലപ്പുഴയിൽ മകന്റെ വെട്ടേറ്റ് അച്ഛൻ കൊല്ലപ്പെട്ടു; അമ്മ ഗുരുതരാവസ്ഥയില്‍

ആലപ്പുഴ: ആലപ്പുഴയിൽ മകന്റെ വെട്ടേറ്റ് അച്ഛൻ കൊല്ലപ്പെട്ടു. വെട്ടേറ്റ്‌ ഗുരുതര പരിക്കേറ്റ അമ്മയെ സ്വകാര്യ ആശുപത്രിയിൽ പ്രവേശിപ്പിച്ചു. കണ്ടല്ലൂർ തെക്ക് പീടികച്ചിറയിൽ നടരാജൻ (62) ആണ് മരിച്ചത്. ഭാര്യ സിന്ധുവിനെ(49) ഗുരുതര പരിക്കുകളോടെ മാവേലിക്കര തട്ടാരമ്പലത്തിലെ സ്വകാര്യ ആശുപത്രിയിൽ പ്രവേശിപ്പിച്ചു. സംഭവത്തിൽ ഇവരുടെ മകനും മാവേലിക്കര ബാറിലെ അഭിഭാഷകനുമായ നവജിത്ത് നടരാജനെ കനകക്കുന്ന് പൊലീസ് കസ്റ്റഡിയിലെടുത്തു.

ഞായർ രാത്രി 9.30 ഓടെയാണ്‌ സംഭവം. കുടുംബവഴക്കാണ് കാരണമെന്നാണ് പ്രാഥമിക വിവരം. മാതാപിതാക്കളെ വെട്ടിപ്പരിക്കേൽപ്പിച്ചശേഷം പ്രതി ഭീകാരന്തരീക്ഷം സൃഷ്ടിച്ചു. വാക്കത്തികൊണ്ടായിരുന്നു ആക്രണം. നടരാജന്റെ തലയ്ക്ക് ഒട്ടേറെ തവണ വെട്ടേറ്റു. ഇതിനുശേഷം വീടിന്റെ രണ്ടാംനിലയിലേക്ക് കയറിയ ഇയാളെ സാഹസികമായാണ് പൊലീസ് പിടികൂടിയത്. പരിക്കേറ്റവരെ നാട്ടുകാരാണ്‌ സ്വകാര്യ ആശുപത്രിയിലെത്തിച്ചത്‌.