മുതിർന്ന സിപിഐ എം നേതാവ് എം ലീലാമ്മ അന്തരിച്ചു

എഴുകോൺ: മുതിർന്ന സിപിഐ എം നേതാവ് നെടുവത്തൂർ ആനക്കോട്ടൂർ ആലുവിളവീട്ടിൽ എം ലീലാമ്മ (68)അന്തരിച്ചു. സിപിഐ എം നെടുവത്തൂർ ഏരിയ കമ്മിറ്റിഅംഗം, അഖിലേന്ത്യ ജനാധിപത്യ മഹിളാ അസോസിയേഷൻ സംസ്ഥാന വൈസ് പ്രസിഡന്റ്, ജില്ലാ പ്രസിഡന്റ്, കൊല്ലം ജില്ലാ പഞ്ചായത്ത് സ്ഥിരം സമിതി അധ്യക്ഷ, ജില്ലാ പഞ്ചായത്ത് അംഗം, കൊട്ടാരക്കര ബ്ലോക്ക് പഞ്ചായത്ത് വൈസ് പ്രസിഡന്റ് എന്നീ നിലകളിൽ പ്രവർത്തിച്ചിരുന്നു. നിലവിൽ സിപിഐ എം തേവലപ്പുറം ലോക്കൽ കമ്മിറ്റി അംഗമാണ്.

ബുധൻ രാത്രി 10.30ന് പുത്തൂരിലെ സ്വകാര്യ ആശുപത്രിയിലായിരുന്നു അന്ത്യം. ഹൃദയസംബന്ധമായ അസുഖത്തെ തുടർന്ന് ചികിത്സയിലായിരുന്നു. കൊട്ടാരക്കര താലൂക്കാശുപത്രി മോർച്ചറിയിൽ സൂക്ഷിച്ചിട്ടുള്ള മൃതദേഹം വ്യാഴാഴ്ച സംസ്കരിക്കും.

പരേതരായ മത്തായിയുടെയും ശോശാമ്മയുടെയും മകളാണ്. സഹോദരങ്ങൾ: പരേതരായ സദാനന്ദൻ, ലില്ലി, തങ്കപ്പൻ.