വി എസ്​ നിർദേശിച്ചു; 
പുന്നപ്ര സമരഭൂമി പാർടിക്ക്​ സ്വന്തം

ആലപ്പുഴ

‘‘ഈ സ്ഥലം നിങ്ങൾ വാങ്ങണം. അല്ലെങ്കിൽ അടുത്ത തവണ ഞാൻ ഇവിടെ അനുസ്​മരണപരിപാടിയിൽ പങ്കെടുക്കില്ല’. പുന്നപ്ര സമരഭൂമിയായ 19.5 സെന്റ്‌ സ്ഥലം വാങ്ങണമെന്ന്‌ തനിക്ക്‌ കർശനനിർദേശം നൽകിയ വി എസിനെ ഓർമിക്കുകയാണ്‌ സിപിഐ എം ജില്ലാ സെക്രട്ടറി ആർ നാസർ.

2018ൽ പുന്നപ്ര–വയലാർ വാരാചരണത്തിന്​ എത്തിയപ്പോഴാണ്‌ വി എസ്‌ പുന്നപ്ര സമരഭൂമി വാങ്ങണമെന്ന്‌ ആവശ്യപ്പെട്ടത്‌. ഇത്‌ പാർടിക്ക്‌ തള്ളിക്കയളയാനാവുമായിരുന്നില്ല. സർ സിപിയുടെ കിരാതഭരണത്തിനെതിരെ രണധീരർ പൊരുതിവീണ പ്രദേശത്തോട്‌ ആ മണ്ണിന്റെ മകനും സമരനായകനുമായ വി എസിന്‌ അത്രത്തോളം അടുപ്പമായിരുന്നു. പാർടി ഉടൻതന്നെ സ്ഥലം വാങ്ങി. ഇവിടെ നേരത്തേയുണ്ടായിരുന്ന 10 സെന്റും കൂടി ചേർത്ത്​ ഇപ്പോൾ 29.5 സെന്റ്​ സ്ഥലമുണ്ട്​.

2019 ൽ പുന്നപ്ര–-വയലാർ സമരത്തിന്റെ 73–ാം വാർഷികത്തിന്‌ ഇവിടേക്ക്‌ വി എസ്‌ എത്തി. രാവിലെ സ്‌മൃതിമണ്ഡപത്തിൽ പുഷ്‌പചക്രം അർപ്പിച്ച വി എസ്‌ വൈകിട്ട്‌ പറവൂർ രക്‌തസാക്ഷി നഗറിൽ അനുസ്‌മരണ സമ്മേളനവും ഉദ്‌ഘാടനംചെയ്‌തു. അന്ന്‌ അണികൾക്ക്‌ ആവേശം പകർന്നുമടങ്ങിയ സമരനായകന്‌ ഒരിക്കൽക്കൂടി ഇവിടെയെത്താൻ അനാരോഗ്യം അനുവദിച്ചില്ല.