മുസ്ലിം ഇതര അം​ഗങ്ങൾ വഖഫ് ബോർഡിൽ വേണ്ട എന്ന് പറയുന്നവർ വർ​ഗീയവാദികളാണോ? മുഖ്യമന്ത്രിയോട് പ്രതിപക്ഷനേതാവ്

തിരുവനന്തപുരം: വഖഫ് ബോർഡിൽ അമുസ്ലീങ്ങളെ അം​ഗങ്ങളാക്കിയതിൽ മുഖ്യമന്ത്രി വി ഡി സതീശൻ അടിസ്ഥാനരഹിതമായ വാദങ്ങളാണ് ഉന്നയിക്കുന്നതെന്ന് പ്രതിപക്ഷനേതാവ് പിണറായി വിജയൻ പറഞ്ഞു. താൻ വർ​ഗീയത പ്രചരിപ്പിച്ചുവെന്ന ആരോപണം എന്ത് അടിസ്ഥാനത്തിലാണെന്ന് മുഖ്യമന്ത്രി തന്നെ വ്യക്തമാക്കണം. മുസ്ലീം ഇതര അം​ഗങ്ങൾ വഖഫ് ബോർഡിൽ വേണ്ട എന്ന് ആവർത്തിക്കുന്ന എല്ലാവരും വർ​ഗീയവാദികളാണോ? വ്യക്തമായ മലക്കംമറിച്ചിലാണ് വഖഫ് വിഷയത്തിൽ യുഡിഎഫ് നടത്തിയത്. അത് ചോദ്യംചെയ്യുന്നത് വർ​ഗീയവാദമോ ന്യൂനപക്ഷ പ്രീണനമോ ആകുമോ? അങ്ങനെയെങ്കിൽ, സംഘപരിവാറിന്റെ നാവ് കടമെടുത്ത് മുഖ്യമന്ത്രി സംസാരിക്കുകയാണെന്ന് പറയേണ്ടിവരുമെന്നും പ്രതിപക്ഷനേതാവ് വാർത്താസമ്മേളനത്തിൽ പറഞ്ഞു.

വഖഫ് ബോർഡിൽ അമുസ്ലീങ്ങളെ ഉൾപ്പെടുത്തുക എന്ന നിലപാട് ബിജെപിയുടേതാണ്. ബിജെപി നേതൃത്വം നൽകുന്ന കേന്ദ്രസർക്കാരാണ് നിയമഭേദ​ഗതി കൊണ്ടുവന്നത്. ഒരു ബിജെപി ഇതര സർക്കാർ എന്ന നിലയ്ക്ക് ഈ നിയമഭേദ​ഗതി അം​ഗീകരിക്കുന്ന ആദ്യ സംസ്ഥാനമായാണ് കേരളത്തെ യുഡിഎഫ് സർക്കാർ മാറ്റി. കേന്ദ്രസർക്കാരിന്റെ നിയമഭേദ​ഗതി അം​ഗീകരിക്കുന്ന നിലപാടാണ് ഹൈക്കോടതിയിൽ സംസ്ഥാന സർക്കാർ സ്വീകരിച്ചത്. ഇത് വ്യക്തമായ സംഘപരിവാർ സേവയാണ്. ഇത് തുറന്നുകാട്ടപ്പെട്ടപ്പോഴാണ് മുഖ്യമന്ത്രി നിലവിട്ട് സംസാരിച്ചത്.

എല്ലാ മതവിഭാ​ഗങ്ങൾക്കും ഭരണഘടന ഉറപ്പുനൽകുന്ന വിശ്വാസസ്വാതന്ത്ര്യമാണ് എൽഡിഎഫ് സർക്കാരും, നേരത്തെ മുഖ്യമന്ത്രി എന്ന നിലയിൽ താനും സ്വീകരിച്ചത്. അതിൽ അണുകിട വ്യത്യാസം വന്നിട്ടില്ല. ഓരോവിഭാ​ഗത്തിന്റെയും മതസ്ഥാപനങ്ങൾ കൈകാര്യംചെയ്യുന്നതിന് അതത് വിഭാ​ഗങ്ങൾ ഉൾക്കൊള്ളുന്ന ഭരണസമിതികളാണ് കാലാകാലങ്ങളായി ചുമതല നിർവഹിച്ചുവന്നിരുന്നത്.

വഖഫ് നിയമത്തിൽ മുൻപ് പല പരിഷ്കാരങ്ങൾ വന്നപ്പോഴും അപ്പോഴൊന്നും വഖഫ് ബോർഡിൽ മുസ്ലിം ഇതര വിഭാ​ഗങ്ങളിലുള്ളവരെ അം​ഗങ്ങളാക്കിയിട്ടില്ല. ഒരു നൂറ്റാണ്ടിലേറെയായി തുടർന്നുവരുന്ന സമ്പ്രദായം മാറ്റാനാണ് ബിജെപി കേന്ദ്രത്തിൽ അധികാരത്തിൽവന്നപ്പോൾ ഭേദ​ഗതിയിലൂടെ കൊണ്ടുവന്നത്. അതിനോട് വിയോജിക്കുക എന്നത് വർ​ഗീയത പ്രചരിപ്പിക്കലാണോ? എന്നാൽ ബിജെപി സർക്കാരിനോട് യോജിച്ചുപോകുന്നത് സംഘപരിവാർ അജണ്ടയ്ക്ക് മുന്നിലുള്ള നഗ്നമായ കീഴടങ്ങലല്ലേ? ഒരു കോൺ​ഗ്രസ് മുഖ്യമന്ത്രി ബിജെപിയുടെ നിലപാട് സ്വീകരിക്കാമോ? - പ്രതിപക്ഷനേതാവ് ചോദിച്ചു.

അമുസ്ലീങ്ങളെ ഉൾപ്പെടുത്തണമെന്ന നിലപാട് കേന്ദ്രസർക്കാർ സ്വീകരിച്ചപ്പോൾ ആ ഘട്ടത്തിൽതന്നെ അന്ന് അധികാരത്തിലുണ്ടായിരുന്ന എൽഡിഎഫ് സർക്കാർ ശക്തമായ എതിർപ്പ് ഉയർത്തിയിരുന്നു. ഒരു മതവിഭാ​ഗത്തിനെതിരെയും ഇത്തരമൊരു കടന്നുകയറ്റം പാടില്ല എന്ന നിലയിലാണ് ആ എതിർപ്പ് ഉയർന്നത്. അതിന്റെ അടിസ്ഥാനത്തിൽ കേരളത്തിൽ നിയമസഭ ഏകകണ്ഠമായി ഈ നിയമത്തിനെതിരെ പ്രമേയം പാസാക്കുകയും ചെയ്തു. അമുസ്സീങ്ങളെ വഖഫ് ബോർഡിൽ നിയമിക്കണമെന്ന നിയമഭേ​ദ​ഗതി അതേപടി അം​ഗീകരിച്ച് നടപ്പാക്കുകയല്ല അന്ന് എൽഡിഎഫ് സർക്കാർ ചെയ്തത്. അതിനെതിരെ സാധ്യമാകുന്ന എല്ലാ പോരാട്ടങ്ങളും നടത്തി. ആ വസ്തുതകൾക്കുനേരെ കണ്ണടച്ച് ഇരുട്ടാക്കുന്ന പരിപാടിയാണ് മുഖ്യമന്ത്രി സ്വീകരിച്ചതെന്നും പിണറായി പറഞ്ഞു.

പാർലമെന്റിൽ വഖഫ് ഭേദ​ഗതിബിൽ പരി​ഗണനയ്ക്ക് വന്നപ്പോൾ ഇടതുപക്ഷ എംപിമാർ ശക്തമായ എതിർപ്പുയർത്തി. അന്ന് കോൺ​ഗ്രസ് എംപിമാർക്കും ഇതേ നിലപാടായിരുന്നു. പക്ഷേ ഭരണമാറ്റത്തിന് ശേഷം മുൻപ് പറഞ്ഞ അതേ നിലപാട് താൻ ആവർത്തിച്ചപ്പോൾ, തന്നെ വർ​ഗീയവാദിയായി മുദ്രകുത്തുകയാണ് മുഖ്യമന്ത്രി ചെയ്തത്.

വഖഫ് നിയമഭേ​ദ​ഗതിക്കെതിരായി ന്യൂനപക്ഷങ്ങൾക്കിടയിൽ ഉയർന്നുവന്ന ആശങ്കകളെ വർ​ഗീയതയാണ് എന്ന് അധിക്ഷേപിക്കുന്നത് സംഘപരിവാർ രാഷ്ട്രീയമാണ്. പുതിയ നിയമഭേദ​ഗതിയിലൂടെ വഖഫ് ബോർഡിൽ മുസ്ലിം സമുദായത്തിൽനിന്നുള്ള അം​ഗങ്ങൾ ന്യൂനപക്ഷമായി മാറാനുള്ള സാധ്യതയാണ് അന്ന് എൽഡിഎഫ് സർക്കാർ ചൂണ്ടിക്കാട്ടിയത്. യുഡിഎഫ് സർക്കാരിന്റേത് വഞ്ചനാപരമായ നിലപാടാണെന്നും പ്രതിപക്ഷനേതാവ് പറഞ്ഞു.