പിശകുകൾ തിരുത്തി പാർടി മുന്നേറും: എം എ ബേബി

കോഴിക്കോട്: പാർടിക്ക് പറ്റിയ പിശകുകൾ തിരുത്തി മുന്നേറുമെന്നും സംഘടനാ പരമായ തിരുത്തലുകൾ വരുത്താനാണ് സിപിഐ എം വിപുലീകൃത സംസ്ഥാന കമ്മിറ്റി ചേർന്നതെന്നും ജനറൽ സെക്രട്ടറി എം എ ബേബി പറഞ്ഞു. പത്ത് വർഷത്തെ ഭരണത്തിൽ സർക്കാരിന്റെ ജനക്ഷേമ പ്രവർത്തനങ്ങൾ വോട്ടായി മാറുമെന്ന് പാർടിയും നേതൃത്വവും കരുതി. എന്നാൽ അടിയിലൂടെ നടക്കുന്ന കള്ള പ്രചാരവേലകൾ ജനങ്ങൾ സ്വാധീനിച്ചെന്ന് തിരിച്ചറിഞ്ഞ് കൃത്യമായ മറുപടി നൽകുന്നതിൽ ജാ​ഗ്രത കുറവുണ്ടായി. ഇതെല്ലാം തിരുത്തി പാർടി മുന്നോറുമെന്നും അദ്ദേഹം പറഞ്ഞു.

വിപുലീകൃത സംസ്ഥാന കമ്മിറ്റി പ്രസ്ഥാനത്തിനേറ്റ തിരിച്ചടികൾ കൃത്യമായ പരിശോധയ്ക്ക് വിധേയമാക്കി. സിപിഐ എമ്മിനെതിരെ വലിയ രീതിയിലുള്ള വ്യാജ പ്രതീതിയാണ് നിർമിക്കപ്പെട്ടത്. പുരോ​ഗതിയെ എതിർക്കുന്ന പ്രതിലോമ ശക്തികളെ കൂടെക്കൂട്ടിക്കൊണ്ട് കുപ്രചാരണങ്ങൾ നടത്തി. സിപിഐഎം- ആ‌‍ർഎസ്എസ് ബന്ധമെന്ന് കുപ്രാചരണം നടത്തി. ഇവയെല്ലാം തിരിച്ചടിക്ക് കാരണമായി.

ഇവ തിരിച്ചറിഞ്ഞ് മുന്നേറാനാണ് വിപുലീകൃത സംസ്ഥാന കമ്മിറ്റി ചേർന്നത്. കേരളത്തിൽ മാത്രമല്ല ബം​ഗാളിലും വിപുലീകൃത സംസ്ഥാന കമ്മിറ്റി ചേർന്നു. പാർടിക്ക് വലിയ കരുത്ത് പകരുന്ന തീരുമാനങ്ങളാണ് യോ​ഗത്തിൽ വന്നതെന്നും എം എ ബേബി പറഞ്ഞു.