സംസ്ഥാനത്ത് വീണ്ടും പനിമരണം; ഷി​ഗെല്ല രോ​ഗലക്ഷണങ്ങളോടെ ചികിത്സയിൽ കഴിഞ്ഞ 54 കാരി മരിച്ചു

കോഴിക്കോട്: സംസ്ഥാനത്ത് വീണ്ടും പനിമരണം. കോഴിക്കോട് മാവൂർ പാറമ്മൽ സ്വദേശി സുനിത (54) ആണ് മരിച്ചത്. വയറിളക്കത്തെ തുടർന്ന് സുനിത ആദ്യം സ്വകാര്യ ആശുപത്രിയിൽ ചികിത്സ തേടി. എന്നാൽ പനി മൂർച്ഛിച്ചതോടെ ഇവരെ മെഡിക്കൽ കോളേജ് ആശുപത്രിയിൽ പ്രവേശിപ്പിക്കുകയായിരുന്നു. ഷി​ഗെല്ല രോ​ഗലക്ഷണങ്ങൾ പ്രകടിപ്പിച്ചിരുന്നതിനാൽ ഇവരുടെ സാംപിൾ എടുത്ത് പരിശോധനയ്ക്ക് അയച്ചിരുന്നു. എന്നാൽ പരിശോധനാ ഫലം വന്നിട്ടില്ല. ഇന്ന് പുലർച്ചയോടെ പനി മൂർച്ഛിക്കുകയും സുനിത മരണത്തിന് കീഴട‌ങ്ങുകയുമായിരുന്നു.

അതേസമയം സംസ്ഥാനത്ത് ആശങ്കയുയർത്തി ഷി​ഗെല്ല ബാധിതർ വർധിച്ചു വരികയാണ്. കഴിഞ്ഞ ദിവസം 10 പേർക്ക് കൂടിയാണ് രോ​ഗബാധ സ്ഥിരീകരിച്ചത്. കോഴിക്കോട് 3, തിരുവനന്തപുരം, തൃശൂർ, മലപ്പുറം 2 വീതം, പാലക്കാട് ഒന്ന് എന്നിങ്ങനെയാണ് രോ​ഗബാധ റിപ്പോർട് ചെയ്തത്. നിലവിൽ കോഴിക്കോട് (36), വയനാട് (18), തൃശൂർ (11) ആലപ്പുഴ (3) എന്നീ നാല് ജില്ലകളിലാണ് ഔട്ട്ബ്രേക്ക് പ്രഖ്യാപിച്ചിട്ടുള്ളത്.

സംസ്ഥാനത്ത് ജൂൺ മാസത്തിൽ മാത്രം 120 പേർക്കാണ് ഷി​ഗെല്ല രോ​ഗം സ്ഥിരീകരിച്ചത്. അഞ്ച് മരണവും റിപ്പോർട് ചെയ്തു. കോഴിക്കോട്, വയനാട് ജില്ലകളിലാണ് ഏറ്റവും കൂടുതൽ പേർക്ക് രോഗം സ്ഥിരീകരിച്ചത്. ഈ വർഷം ഇതുവരെ 196 ഷിഗെല്ല രോഗബാധ റിപ്പോർട്ട് ചെയ്തു. മലപ്പുറം (16), തിരുവനന്തപുരം (15), കൊല്ലം (8), ഇടുക്കി (3), എറണാകുളം (2), കണ്ണൂർ (7), പാലക്കാട് (1)എന്നിവിടിങ്ങളിലും ജൂൺ മാസം ഷിഗെല്ല രോഗബാധ റിപ്പോർട്ട് ചെയ്തു.