ദേശീയപാത 66: മലപ്പുറം കടക്കാൻ അന്ന്‌ 3 മണിക്കൂർ; ഇന്ന്‌ 45 മിനിറ്റ്‌

മലപ്പുറം : രാമനാട്ടുകരയിൽനിന്ന്‌ മലപ്പുറം ജില്ല കടന്ന്‌ തൃശൂർ ജില്ലയിലെത്താൻ ഇതുവരെ മൂന്ന്‌ മണിക്കൂർ വേണമായിരുന്നു. ഇന്ന്‌ 45 മിനിറ്റുകൊണ്ട്‌ ജില്ല കടക്കാം. ജില്ലയിൽ ദേശീയപാത 66ന്റെ 99.5 ശതമാനം നിർമാണം പൂർത്തിയായത്തോടെ സ്വപ്‌നയാത്ര യഥാർഥ്യത്തിലേക്ക്‌ കടക്കുകയാണ്‌. സംസ്ഥാനത്ത്‌ ദേശീയപാത നിർമാണം അതിവേഗം പൂർത്തിയായ റീച്ചുകളിൽ രണ്ടും ജില്ലയിലാണ്‌.

രാമനാട്ടുകര–വളാഞ്ചേരി, വളാഞ്ചേരി–കാപ്പിരിക്കാട്‌ റീച്ചുകളുടെ നിർമാണപ്രവൃത്തി അവസാനഘട്ടത്തിലാണ്‌. രാമനാട്ടുകര–വളാഞ്ചേരി റീച്ച്‌ 39.68 കിലോമീറ്ററും വളാഞ്ചേരി–കാപ്പിരിക്കാട്‌ റീച്ച്‌ 37.35 കിലോമീറ്ററുമാണ്‌. കുറ്റിപ്പുറം റെയിൽവേ മേൽപ്പാലവും കൂരിയാട്‌ നിർമിക്കുന്ന വയഡറ്റ്‌ പാലവും മാത്രമാണ്‌ പൂർത്തിയാകാനുള്ളത്‌. മൂന്ന്‌ മാസത്തിനകം മുഴുവൻ നിർമാണവും കഴിയുമെന്നാണ്‌ പ്രതീക്ഷ.

ലൈറ്റുകളും സിഗ്നൽ ബോർഡുകളുമെല്ലാം വന്നു. പാതയുടെ രാത്രികാല ദൃശ്യങ്ങൾ നവമാധ്യമങ്ങളിൽ തരംഗമായി മാറി. ജില്ലയിലെ ദേശീയപാത വികസനത്തിനായി സംസ്ഥാന സർക്കാർ 900 കോടി രൂപയാണ്‌ ചെലവഴിച്ചത്‌. ഭൂമി ഏറ്റെടുക്കലിനായി സംസ്ഥാനത്ത്‌ എറ്റവും അധികം തുക ചെലവഴിച്ചതും ജില്ലയിലാണ്‌.

116 കാമറകൾ

ദേശീയപാതയിൽ 116 സിസിടിവി കാമറകളും സൂചക ബോർഡുകളും സ്ഥാപിച്ചുകഴിഞ്ഞു. ഒരോകിലോ മീറ്റർ ഇടവിട്ടാണ്‌ കാമറ. കാമറകളിൽ 60 എണ്ണം 360 ഡിഗ്രി കാമറകളാണ്‌. ദ‍ീർഘദൂര ദൃശ്യങ്ങൾ പിടിച്ചെടുക്കാൻ കഴിയുന്നതാണ്‌ ഭൂരിപക്ഷവും. മൂന്ന്‌ മിനിറ്റിൽ കൂടുതൽ സമയം ഹൈവേയിൽ വാഹനങ്ങൾ നിർത്തിയിട്ടാൽ അതും കാമറയിൽ പതിയും. വാഹനങ്ങളുടെ വേഗം, തെറ്റായ ട്രാക്കിലൂടെയുള്ള ഓട്ടം, സീറ്റ്‌ ബൈൽറ്റ്‌ ധരിക്കാതിരിക്കൽപോലുള്ള കാര്യങ്ങളും പതിയും. വെട്ടിച്ചിറയിലും കുറ്റിപ്പുറത്തും 24 മണിക്കൂർ കൺട്രോൾ റൂം സജ്ജമാക്കും.

വാഹനങ്ങളുടെ വേഗം കാണിക്കുന്ന ഡിജിറ്റൽ ബോർഡുകളും സ്ഥാപിച്ചു. അഞ്ച്‌ കിലോമീറ്റർ ഇടവിട്ടാണ്‌ ഡിജിറ്റൽ ബോർഡ്‌.

വട്ടപ്പാറ അപകടവളവല്ല

അടിക്കടിയുണ്ടാകുന്ന അപകടങ്ങൾകൊണ്ട്‌ കുപ്രസിദ്ധിനേടിയ വട്ടപ്പാറ വളവ്‌ ഇനിയില്ല. ദേശീയപാത നിർമാണം പൂർത്തിയാകുമ്പോൾ ഇ‍ൗ ദുരന്തവളവ്‌ പഴങ്കഥയാകും. വളാഞ്ചേരിയിലും കോട്ടക്കലും പുതിയ ബൈപാസ്‌ വന്നതോടെ രണ്ടിടങ്ങളിലും ഗതാഗതക്കുരുക്കിന്‌ ശമനമായി. വട്ടപ്പാറ– ഓണിയിൽ പാലം ബൈപാസിലാണ്‌ നിലവിൽ സംസ്ഥാനത്തെ എറ്റവും വലിയ വയഡറ്റ്‌ പാലമുള്ളത്‌. 4.5 കിലോ മീറ്ററാണ്‌ നീളം.

കൂരിയാട്ടും വയഡറ്റ്‌

ദേശീയപാത ഇടിഞ്ഞ്‌ സർവീസ്‌ റോഡിലേക്കുവീണ കൂരിയാട്‌ വയഡറ്റ്‌ പാലത്തിന്റെ നിർമാണം വേഗത്തിൽ നടക്കുന്നു. ഇവിടുത്തെ വയഡറ്റ്‌ പാലത്തിന്റെ നീളം നാനൂറ്‌ മീറ്ററോളം വരും. പാലത്തിനടിയിൽ വെള്ളം ഒഴുകിപ്പോകാനായുള്ള മൂന്ന്‌ കലുങ്കുകൾ നിലനിർത്തിയാണ്‌ വയഡറ്റ്‌ പാലം.

കൂടുതൽ നടപ്പാലം

പ്രധാന ജങ്‌ഷനുകളിലെല്ലാം അടിപ്പാതയോ മേൽപ്പാതയോ നിർമിച്ചിട്ടുണ്ട്‌. ഇതിനുപുറമേ പലയിടങ്ങളിലും ദേശീയപാതക്ക്‌ കുറുകെ നടപ്പാലവുമുണ്ട്‌. പ്രദേശികമായി എതിർപ്പ്‌ ഉയർന്നതിനെ തുടർന്ന്‌ രണ്ടത്താണി, കലിക്കറ്റ്‌ സർവകലാശാല, കോഹിനൂർ, വെളിമുക്ക്, കൊളപ്പുറം എന്നിവിടങ്ങളിൽകൂടി നടപ്പാലം പണിയും. പൊന്നാനി ഉറൂബ്‌ നഗർ, എഐ ഗേൾസ് ഹൈസ്‌കൂൾ, തവനൂർ മദിരശേരി എന്നിവിടങ്ങളിലും നടപ്പാലം വേണമെന്ന ആവശ്യം ശക്തമാണ്‌. ജനങ്ങൾക്ക്‌ കൂടുതൽ ഉപകാരപ്രദമാകുന്ന തരത്തിൽ എൻട്രിയും എക്‌സിറ്റും മാറ്റുന്ന കാര്യവും പരിഗണനയിലാണ്‌.

കുറ്റിപ്പുറം റെയിൽവേ മേൽപ്പാലം

കുറ്റിപ്പുറം റെയിൽവേ മേൽപ്പാലത്തിന്റെ നിർമാണം പുരോഗമിക്കുന്നു. റെയിൽവേയുടെ അനുമതി കിട്ടാനുള്ള കാലതാമസമാണ്‌ പ്രവൃത്തി വൈകാൻ കാരണമായത്‌.

ടോൾ ബൂത്ത്‌ കഞ്ഞിപ്പുരയിൽ

ജില്ലയിൽ ദേശീയപാത ടോൾ ബൂത്ത്‌ വളാഞ്ചരിക്ക്‌ സമീപം കഞ്ഞിപ്പുരയിലാണ്‌. ഇവിടെ കൺട്രോൾ റൂമും മൂന്ന്‌ ആംബുലൻസുകളും ക്രെയിനും അടക്കമുള്ള സംവിധാനങ്ങളുണ്ടാകും.

ഇവർക്ക്‌ വിലക്ക്‌

ടൂ വീലർ‍, ഓട്ടോറിക്ഷ, ട്രാക്ടർ, കാൽനടയാത്രക്കാർ എന്നിവർക്ക്‌ ദേശീയപാതയിൽ പ്രവേശനമില്ല. പാതയിൽ കടന്നാൽ പിഴയുണ്ടാകും. ദേശീയപാതയിലേക്ക്‌ പ്രവേശിക്കാൻ എൻട്രി പോയിന്റും പുറത്തുകടക്കാൻ എക്‌സിറ്റ്‌ പോയിന്റുമുണ്ടാകും.