കൊലക്കേസ് പ്രതിക്ക്​ വിവാഹിതനാവാൻ പരോൾ; യുവതിയുടെ പ്രണയം കാണാതിരിക്കാനാവില്ലെന്ന് ഹൈക്കോടതി

കൊച്ചി : കൊലപാതകക്കേസിൽ ജീവപര്യന്തം ശിക്ഷിക്കപ്പെട്ട്​ വിയ്യൂർ സെൻട്രൽ ജയിലിൽ കഴിയുന്ന പ്രതിക്ക്​ വിവാഹിതനാവാൻ പരോൾ അനുവദിച്ച് ഹൈക്കോടതി. വിവാഹത്തിന്​ സാധാരണ പരോൾ അനുവദിക്കാറില്ലെങ്കിലും പ്രത്യേക അധികാരം ഉപയോഗിച്ചാണ്​ തൃശൂർ സ്വദേശിയായ പ്രശാന്തിന്​ ജസ്റ്റിസ് പി വി കുഞ്ഞികൃഷ്ണൻ 15 ദിവസത്തെ അടിയന്തര പരോൾ അനുവദിച്ചത്​.

കൊലപാതകക്കേസിൽ ജീവപര്യന്തം തടവിന് ശിക്ഷിക്കപ്പെട്ടയാളായിട്ടും വിവാഹം കഴിക്കാനുള്ള ​യുവതിയുടെ മനസ് കോടതി ചൂണ്ടിക്കാട്ടി. ജൂൺ 13ന്​ വിവാഹം നടത്താൻ പരോൾ അനുവദിക്കണമെന്ന ആവശ്യം ജയിൽ അധികൃതർ തള്ളിയതിനെ തുടർന്നാണ്​ ​പ്രശാന്തിന്‍റെ മാതാവ്​ ഹൈകോടതിയെ സമീപിച്ചത്​. വിവാഹത്തിനുവേണ്ടി പരോൾ അനുവദിക്കാൻ വകുപ്പില്ലെന്ന്​ വ്യക്തമാക്കിയായിരുന്നു ജയിലധികൃതർ അപേക്ഷ നിരസിച്ചത്.

യുവതിയുടെ ആഴത്തിലുള്ള പ്രണയം കാണാതിരിക്കാനാവില്ലെന്ന്​​ വ്യക്തമാക്കിയ കോടതി, ഇരുവർക്കും ആശംസകൾ അർപ്പിച്ചാണ്​ പരോൾ അനുവദിച്ചത്​. അമേരിക്കൻ കവയിത്രി മായ ആഞ്ജലോ പ്രണയം തടസങ്ങൾ അംഗീകരിക്കില്ല എന്ന വാക്യങ്ങളും ഉത്തരവിൽ രേഖപ്പെടുത്തിയിട്ടുണ്ട്​.