‘കേരള ഈസ്‍ ദ മോസ്റ്റ് എജ്യുക്കേറ്റഡ് സ്റ്റേറ്റ് ഇൻ ഇന്ത്യ’ ; ലെസോത്തോ ടു കേരള

തൊടുപുഴ : ‘കേരള ഈസ്‍ ദ മോസ്റ്റ് എജ്യുക്കേറ്റഡ് സ്റ്റേറ്റ് ഇൻ ഇന്ത്യ’...ദക്ഷിണാഫ്രിക്കയിലെ ലെസോത്തോ സ്വദേശി ഡിയവൺ റഡിയവൺ കേരളത്തിൽ പഠിക്കാനെത്തിയതിന് പിന്നിലെ പ്രധാന കാരണം ഇതാണ്.

എംജി സർവകലാശാല ക്യാമ്പസിൽ എംഎജെഎംസി ആദ്യവർഷ വിദ്യാർഥിയായ ഡിയവൺ ദസ്‍തക് വേദിയിൽ ഇം​ഗ്ലീഷ് ചെറുകഥാ രചനയ്‍ക്കെത്തിയതായിരുന്നു. ആറുമാസമേ ആയുള്ളു കോഴ്സ് തുടങ്ങിയിട്ട്. യുനെസ്‍കോ യൂത്ത് ഡെസ്‍കിൽ രണ്ട് വർഷം പ്രവർത്തിച്ച ഈ 30 കാരിക്ക് മലയാളികളേക്കുറിച്ചും നല്ല അഭിപ്രായം. ഇവിടുത്തേ പൊറോട്ട, ചിക്കൻ ബിരിയാണി, മുട്ടക്കറി തുടങ്ങിയ വിഭവങ്ങളോടും പ്രിയമേറെ.

സ്വദേശത്ത് കഥകൾ എഴുതിയിരുന്നെങ്കിലും പ്രസിദ്ധീകരണത്തിലേക്കെത്തിയിട്ടില്ല. സുഹൃത്തുക്കളോടൊപ്പമാണ് ദസ്‍തക് വേദിയിലെത്തിയത്. കേരളത്തെയും മലയാളികളെയും ഇഷ്‍ടപ്പെട്ട് നമ്മുടെ നാട്ടിലുണ്ടാവും ഈ ദക്ഷിണാഫ്രിക്കക്കാരി.