മലപ്പുറത്തിനെ മൂന്നോ നാലോ ജില്ലയാക്കേണ്ടിവരും: പിഎംഎ സലാം

മലപ്പുറം: ജനസംഖ്യാനുപാതികമായി ജില്ലകൾ പുനഃക്രമീകരിക്കണമെന്ന് മുസ്ലിം ലീ​ഗ് സംസ്ഥാന ജനറൽ സെക്രട്ടറി പിഎംഎ സലാം പറഞ്ഞു. 45 ലക്ഷത്തിലധികം ജനസംഖ്യയുള്ള മലപ്പുറം ജില്ലയ്ക്കും 10 ലക്ഷത്തോളം ജനസംഖ്യയുള്ള പത്തനംതിട്ട ജില്ലയ്ക്കും ലഭിക്കുന്നത് ഒരേ സൗകര്യങ്ങളാണ്. ജനസംഖ്യ പരി​ഗണിച്ചാൽ മലപ്പുറത്തിനെ മൂന്നോ നാലോ ജില്ലയാക്കേണ്ടി വരാമെന്നും സലാം മാധ്യമങ്ങളോട് പറഞ്ഞു.

വിഭവവിനിയോ​ഗത്തിൽ വിവേചനമുണ്ടാകരുത്. താലൂക്കുകളും പുനഃക്രമീകരിക്കണം. നിലവിലുള്ള അശാസ്ത്രീയത മാറ്റണം. മറ്റ് സംസ്ഥാനങ്ങളിലും വികസന പ്രക്രിയയുടെ ഭാ​ഗമായി പുതിയ ജില്ലകൾ രൂപീകരിച്ചിട്ടുണ്ട്. ഡീലിമിറ്റേഷൻ കമീഷന്റെ റിപ്പോർട്ട് വരുമ്പോൾ യുഡിഎഫ് തീരുമാനമെടുക്കുമെന്നും സലാം പറഞ്ഞു.

എറണാകുളം ജില്ലയെ വിഭജിച്ച് മൂവാറ്റുപുഴ ആസ്ഥാനമായി പുതിയ ജില്ല രൂപീകരിക്കുന്നത് പരി​ഗണിക്കുമെന്ന് കഴിഞ്ഞദിവസം മുഖ്യമന്ത്രി വി ഡി സതീശൻ പറഞ്ഞിരുന്നു. ഇതിനായി ഡീലിമിറ്റേഷൻ കമീഷൻ രൂപീകരിക്കുമെന്നും മുഖ്യമന്ത്രി പറഞ്ഞു. മൂവാറ്റുപുഴയിൽ നടന്ന ചടങ്ങിനിടെയായിരുന്നു മുഖ്യമന്ത്രിയുടെ പ്രഖ്യാപനം.

ഇടുക്കി ജില്ലയിലെ ദേവികുളം, തൊടുപുഴ നിയോജക മണ്ഡലങ്ങളും എറണാകുളം ജില്ലയിലെ മൂവാറ്റുപുഴ, കോതമം​ഗലം, പിറവം എന്നീ മണ്ഡലങ്ങളും പെരുമ്പാവൂരിന്റെ ചില മേഖലകളും ചേർത്ത് മൂവാറ്റുപുഴ ജില്ല രൂപീകരിക്കാൻ നേരത്തെ ആലോചനയുണ്ടായിരുന്നു.

തിരുവനന്തപുരത്ത് നെയ്യാറ്റിൻകര കേന്ദ്രീകരിച്ച് പുതിയ ജില്ല വേണമെന്നും ചർച്ചകളുണ്ട്.

1984ൽ കാസർകോട് ആണ് കേരളത്തിൽ അവസാനം രൂപംകൊണ്ട ജില്ല.