print edition മോഡലിങ്ങിന്റെ മറവിൽ മനുഷ്യക്കടത്ത്‌; തിരുവനന്തപുരം സ്വദേശിയടക്കം
രണ്ട്‌ യുവതികൾ അറസ്റ്റിൽ

കൊച്ചി: മരടിൽ മോഡലിങ്ങിന്റെ മറവിൽ മനുഷ്യക്കടത്ത്‌ നടത്തിയ സംഘത്തിലെ രണ്ട്‌ യുവതികൾ അറസ്റ്റിൽ. ആലുവ സ്വദേശി അലീന, തിരുവനന്തപുരം സ്വദേശി സിന്ധു എന്നിവരാണ്‌ അറസ്റ്റിലായത്‌.

ദുബായിൽ മോഡലിങ്‌ ജോലി വാഗ്‌ദാനം ചെയ്‌ത്‌ യുവതികളെയെത്തിച്ച്‌ അനാശാസ്യത്തിന്‌ ഉപയോഗിക്കുന്ന സംഘത്തിൽപ്പെട്ടവരാണ്‌ ഇരുവരും.

ഇരകളായ യുവതികളുടെ പരാതിയെത്തുടർന്ന്‌ നടത്തിയ അന്വേഷണത്തിലാണ്‌ മരടിൽ താമസിക്കുന്ന അലീനയെ അവിടെനിന്നും സിന്ധുവിനെ മുംബൈയിൽനിന്നും പിടികൂടിയത്‌.

മോഹനവാഗ്‌ദാനങ്ങൾ നൽകി കെണിയിൽവീഴ്‌ത്തിയാണ്‌ ഇവർ യുവതികളെ ചൂഷണത്തിന് ഇരയാക്കിയിരുന്നത്. ദുബായിലെത്തിക്കുന്ന യുവതികളെ രഹസ്യകേന്ദ്രങ്ങളിൽ തടങ്കലിലാക്കും.

തുടർന്ന് മയക്കുമരുന്ന്‌ ബലമായി നൽകി അബോധാവസ്ഥയിലാക്കി കാഴ്‌ചവയ്ക്കുന്നതായിരുന്നു രീതി. ഇതിന്റെ ദൃശ്യങ്ങളും ചിത്രങ്ങളും പകർത്തി ഭീഷണിപ്പെടുത്തുകയും ചെയ്യും. പിന്നിൽ വൻ സംഘമുണ്ടെന്നും വിശദമായ അന്വേഷണത്തിലേക്ക്‌ കടന്നതായും പൊലീസ്‌ പറഞ്ഞു.