ഒരാളെയും സംരക്ഷിക്കില്ല, ഉറച്ച നിലപാടാണ്; ശബരിമല സ്വർണമോഷണക്കേസ് പാർടിയെ പ്രതിരോധത്തിലാക്കില്ല: എം വി ​ഗോവിന്ദൻ

തിരുവനന്തപുരം: ശബരിമല സ്വർണമോഷണക്കേസിൽ കുറ്റവാളികളെന്ന് കണ്ടെത്തുന്ന ഒരാളെയും പാർടി സംരക്ഷിക്കില്ലെന്ന് സിപിഐ എം സംസ്ഥാന സെക്രട്ടറി എം വി ​ഗോവിന്ദൻ പറഞ്ഞു. കേസ് ഒരുതരത്തിലും പാർടിയെ പ്രതിരോധത്തിലാക്കില്ല. ഹൈക്കോടതി നിർദേശമനുസരിച്ച് പ്രവർത്തിക്കുന്ന പ്രത്യേക അന്വേഷണസംഘത്തിന് കുറ്റക്കാരെന്ന് കണ്ടെത്തുന്നവരെയെല്ലാം അറസ്റ്റ് ചെയ്യാം. കുറ്റവാളിയാണോ അല്ലയോ എന്നത് കോടതി കണ്ടെത്തും. സിപിഐ എമ്മിന്റേത് ഉറച്ചനിലപാടാണ്, പാർടിയുടെ കൈ ശുദ്ധമാണെന്നും എം വി ​ഗോവിന്ദൻ പറഞ്ഞു. കട്ടിളപ്പടികളിലെ സ്വർണം നഷ്ടപ്പെട്ടതുമായി ബന്ധപ്പെട്ടകേസിൽ തിരുവിതാംകൂർ ദേവസ്വം ബോർഡ് മുൻപ്രസിഡന്റ് എ പത്മകുമാറിന്റെ അറസ്റ്റിനെക്കുറിച്ചുള്ള മാധ്യമങ്ങളുടെ ചോദ്യത്തോട് പ്രതികരിക്കുകയായിരുന്നു അദ്ദേഹം.

ശബരിമലയിലെ ഒരുതരി സ്വർണംപോലും നഷ്ടപ്പെടാൻ പാടില്ല. ഏത് ഉന്നതരായാലും പിടിക്കപ്പെടണം. സിപിഐ എമ്മിന് കളങ്കമുണ്ടാക്കാൻ ഒരാളെയും അനുവദിക്കില്ല. കുറ്റക്കാരെന്ന് കോടതി കണ്ടെത്തിയാൽ അപ്പോൾ പാർടി സംഘടനാപരമായി ആവശ്യമായ നിലപാട് സ്വീകരിക്കുമെന്നും എം വി ​ഗോവിന്ദൻ പറഞ്ഞു.