എൻഡിഎ നേതാക്കളുമായി സതീശന്റെ രഹസ്യ ചർച്ച: കോൺ​ഗ്രസ് നേതൃത്വം വിശദീകരിക്കണം- ടി പി രാമകൃഷ്ണൻ

തിരുവനന്തപുരം: മം​ഗലാപുരത്ത് എൻഡിഎ നേതാക്കളുമായി വി ഡി സതീശൻ കൂടിക്കാഴ്ച നടത്തിയെന്ന വാർത്തയിൽ കോൺ​ഗ്രസ് നേതൃത്വം വ്യക്തത വരുത്തണമെന്ന് എൽഡിഎഫ് കൺവീനർ ടി പി രാമകൃഷ്ണൻ പറഞ്ഞു. മെയ് ഒന്നിന് രാവിലെ പ്രത്യേക വിമാനത്തിൽ സതീഷൻ മം​ഗലാപുരത്തേക്ക് പോയെന്നും, സ്വർണക്കവർച്ചയിൽ എസ്ഐടി ചോദ്യംചെയ്ത റെജികുമാർ എന്ന വ്യക്തി ഒപ്പം ഉണ്ടായിരുന്നുവെന്നുമാണ് വാർത്തകൾ വന്നത്. ഈ യാത്രയിൽ അദാനി ​ഗ്രൂപ്പിന്റെ പ്രസിഡന്റിനെ സതീശൻ കാണുകയുണ്ടായി. കർണാടകയിലെ എൻഡിഎ നേതാവായ ബി എം ഫാറൂഖിന്റെ വസതിയിൽവെച്ചാണ് കൂടിക്കാഴ്ച നടത്തിത്. ഇത് സംബന്ധിച്ച് കർണാടക കോൺ​ഗ്രസ് കമ്മിറ്റി എഐസിസി നേതൃത്വത്തിന് പരാതി നൽകിയെന്ന വാർത്തയും പുറത്തുവന്നു. വളരെ ​ഗുരുതരമായ വാർത്തയാണ് പുറത്തുവന്നിരിക്കുന്നതെന്നും കെപിസിസി, എഐസിസി നേതൃത്വങ്ങൾ ഇതിൽ വിശദീകരണം നൽകണമെന്നും എൽഡിഎഫ് കൺവീനർ വാർത്താസമ്മേളനത്തിൽ ആവശ്യപ്പെട്ടു.

മുഖ്യമന്ത്രി ആരെന്നതിൽ ഹൈക്കമാൻഡിന്റെ തീരുമാനം വൈകുകയാണ്. ജനവിധി മാനിക്കാൻ കോൺ​ഗ്രസും യുഡിഎഫും തയ്യാറാകണം. എന്നാൽ, കേരളത്തിൽ സർക്കാർ രൂപീകരിച്ചില്ലെങ്കിലും സർക്കാരിന്റെ ഭാ​ഗമായി നടക്കേണ്ട ഭരണനടപടികൾ തുടരുകയാണ്. സംഘടനാഭാരവാഹികൾ നൽകുന്ന ലിസ്റ്റിന് അനുസരിച്ച് സർക്കാർ ജീവനക്കാരെ തലങ്ങും വിലങ്ങും സ്ഥലം മാറ്റുകയാണ്. സർക്കാർ പോലും രൂപീകരിക്കുന്നതിന് മുൻപേ ഉദ്യോ​ഗസ്ഥരെ ഉപയോ​ഗിച്ചുള്ള ഇത്തരം നടപടികൾ ജനാധിപത്യത്തിൽ ചേർന്നതല്ല.

ജനദ്രോഹ നടപടികൾക്കും യുഡിഎഫ് തുടക്കം കുറിച്ചുകഴിഞ്ഞു. 13 ഇന അവശ്യസാധനങ്ങൾക്ക് എൽഡിഎഫ് സർക്കാർ വിലവർധിപ്പിച്ചിരുന്നില്ല. പിന്നീട് ഒരിക്കൽ വിലകൂട്ടിയത് മന്ത്രിസഭായോ​ഗം തീരുമാനിച്ചതുപ്രകാരമാണ്. എന്നാൽ, സപ്ലൈകോയുടെ അരിവില വർ‌ധിപ്പിച്ചിരിക്കുകയാണ് ഇപ്പോൾ. സാധാരണനിലയിൽ മന്ത്രിസഭായോ​ഗമാണ് വിലയിൽ മാറ്റം വരുത്തേണ്ടത്. സപ്ലൈകോ ഡിപ്പോകളിലൂടെ വിതരണം ചെയ്യുന്ന അരിക്ക് രണ്ട് രൂപ വർധിപ്പിച്ചു എന്നാണ് ലഭിക്കുന്ന വിവരം. ഈ നടപടി അങ്ങേയറ്റം പ്രതിഷേധാർഹമാണ്.

പുതിയ സർക്കാരിന് വികസന, ജനക്ഷേമ പ്രവർത്തനങ്ങൾക്ക് എല്ലാവിധ പിന്തുണയും എൽഡിഎഫ് നൽകും. ന്യായമായ എല്ലാ പ്രശ്നങ്ങളിലും ആവശ്യമായ സഹായമുണ്ടാകുമെന്നും ടി പി രാമകൃഷ്ണൻ പറഞ്ഞു.