കലിക്കറ്റ് സർവകലാശാല കലോത്സവത്തിനിടെ കെഎസ്‌യു ആക്രമണം; ഒൻപത് വിദ്യാർഥികൾ ആശുപത്രിയിൽ

മാള: കലിക്കറ്റ്‌ യുണിവേഴ്‌സിറ്റി ഡിസോൺ കലോത്സവ വേദിയിൽ മത്സരാർഥികൾക്കെതിരെ സംഘാടകരുടെ ആക്രമണം. കെഎസ്‌യു ജില്ലാ പ്രസിഡന്റ്‌ ഗോകുലിന്റെ നേതൃത്വത്തിൽ ഇരുമ്പ്‌ വടിയടക്കമുള്ള മാരകായുധങ്ങളുമായി എത്തിയ സംഘമാണ്‌ മത്സരാർഥികളെ ആക്രമിച്ചത്‌. കലോത്സവ വേദിയിൽ നിന്ന്‌ വിദ്യാർഥികളെ സംഘാടകർ തല്ലി ഓടിക്കുകയായിരുന്നു. ഏഴ്‌ മണിക്ക്‌ ആരംഭിക്കേണ്ട നാടക മത്സരം അടക്കമുള്ളവ രാത്രി 12മണി കഴിഞ്ഞിട്ടും തുടങ്ങാത്തതിന്റെ കാരണം അന്വേഷിച്ചതിനു പിന്നാലെയാണ്‌ സംഘാടകർ വിദ്യാർഥികളെ ആക്രമിച്ചത്‌.
സംഘടകരുടെ ബാഡ്‌ജ്‌ ധരിച്ചിരുന്ന കെഎസ്‌യു–യൂത്ത്‌ കോൺഗ്രസ്‌ പ്രവർത്തകർ ആയുധങ്ങളുമായി സംഘടിച്ചെത്തി വിദ്യാർഥികളെ കലോത്സവ വേദിയിൽ നിന്ന്‌ ആട്ടി ഓടിക്കുകയായിരുന്നു. കേരള വർമ കോളേജിലെ ചെയർപേഴ്‌സൺ ഗോപിക നന്ദനയെ ഗോകുലിന്റെ നേതൃത്വത്തിൽ കേസേര എടുത്ത്‌ അടിച്ചു. എസ്‌എഫ്‌ഐ യൂണിറ്റ്‌ സെക്രട്ടറി ആഷിക്കിന്റെ തലയ്‌ക്ക്‌ അടിയിൽ ഗുരുതരമായി പരിക്കേറ്റു. ഒൻപത്‌ വിദ്യാർഥികളെ സംഘാടകരുടെ ആക്രമത്തിൽ പരിക്കേറ്റ്‌ ആശുപ്രതിയിൽ പ്രവേശിപ്പിച്ചു.