58 ജനറൽ സെക്രട്ടറിമാർ, 13 വൈസ് പ്രസിഡന്റുമാർ; കെപിസിസിക്ക് ജംബോ കമ്മിറ്റി

തിരുവനന്തപുരം: ദീർഘനാളത്തെ തർക്കങ്ങൾക്കും വിലപേശലുകൾക്കും ശേഷം കെപിസിസി പുനഃസംഘടന പട്ടിക പ്രസിദ്ധീകരിച്ചു. 58 ജനറൽ സെക്രട്ടറിമാരും 13 വൈസ് പ്രസിഡന്റുമാരും അടങ്ങുന്ന ജംബോ കമ്മിറ്റിയെയാണ് എഐസിസി പ്രഖ്യാപിച്ചത്. രാഷ്ട്രീയകാര്യസമിതിയിൽ ആറ് അം​ഗങ്ങളെക്കൂടി ഉൾപ്പെടുത്തി. തർക്കം കാരണം കെപിസിസി സെക്രട്ടറിമാരെ പ്രഖ്യാപിക്കാൻ കഴിഞ്ഞിട്ടില്ല. ഡിസിസി അധ്യക്ഷമാർക്കും മാറ്റമില്ല.

രാജ്മോഹന്‍ ഉണ്ണിത്താന്‍, വി കെ ശ്രീകണ്ഠന്‍, ഡീന്‍ കുര്യാക്കോസ്, പന്തളം സുധാകരന്‍, സി പി മുഹമ്മദ്, എ കെ മണി എന്നിവരാണ് രാഷ്ട്രീയകാര്യസമിതിയിൽ പുതുതായി ഉള്‍പ്പെട്ടവര്‍. ടി ശരത്ചന്ദ്ര പ്രസാദ്, ഹൈബി ഈഡൻ, പാലോട് രവി, വി ടി.ബൽറാം, വി പി സജീന്ദ്രൻ, മാത്യു കുഴൽനാടൻ, ഡി സുഗതൻ, രമ്യ ഹരിദാസ്, എം ലിജു, എ എ ഷുക്കൂർ, എം വിൻസന്റ്, റോയ് കെ പൗലോസ്, ജയ്സൺ ജോസഫ് എന്നിവരാണ് വൈസ് പ്രസിഡന്റുമാർ.

സംഘടനാ നവീകരണം എന്ന പേരിൽ മറ്റ് സംസ്ഥാനങ്ങളിൽ തെരഞ്ഞെടുപ്പ് നടത്താൻ ഹൈക്കമാൻഡ് ശ്രമിക്കുമ്പോഴാണ് കേരളത്തിൽ വീണ്ടും നേരിട്ടുള്ള നിയമനം നടത്തിയത്. പുനഃസംഘടന അനന്തമായി നീളുന്നതിൽ രാഷ്ട്രീയകാര്യ സമിതിയിൽ ഉൾപ്പെടെ ​നേതാക്കൾ രൂക്ഷവിമർശനം ഉന്നയിച്ചിരുന്നു.