ഭിന്നശേഷിക്കാരനെ ലീ​ഗ് നേതാവിന്റെ മകൻ കാർ ഇടിച്ചുവീഴ്ത്തി, ബന്ധുവിനെ മർദിച്ചു; ദിവസങ്ങൾക്ക് ശേഷം മൊഴിയെടുത്ത് പൊലീസ്

കൊല്ലം: കൊല്ലം ശൂരനാട് ഇലക്ട്രിക് സ്കൂട്ടറിൽ സഞ്ചരിച്ച ഭിന്നശേഷിക്കാരനെ കാർ ഇടിച്ചുവീഴ്ത്തിയതിൽ ദിവസങ്ങൾക്ക് ശേഷം മൊഴിയെടുത്ത് പൊലീസ്. മുസ്ലിം ലീ​ഗ് നേതാവിന്റെ മകനെ രക്ഷിക്കാനുള്ള പൊലീസ് നീക്കം വാർത്തയായതിന് പിന്നാലെയാണ് നടപടി.

ഈ മാസം 23നാണ് സംഭവം. ശൂരനാട് സ്വദേശി ജാസ്മീറാണ് അപകടത്തിൽപെട്ടത്. ജാസ്മീറിന്റെ മുഖത്തും ശരീരത്തിലും പരിക്കേറ്റിരുന്നു. എന്നാൽ കാർ ഓടിച്ച ലീ​ഗ് നേതാവിന്റെ മകൻ നാദിർഷ ജാസ്മീറിന് നേരെ കയർക്കുകയായിരുന്നു. സംഭവം ഓടിയെത്തിയ ജാസ്മീറിന്റെ ബന്ധുവായ റിയാസിനെയും കാറിലുണ്ടായിരുന്നവർ മർദിച്ചു.

പൊലീസിൽ പരാതി നൽകിയെങ്കിലും ഒരു നടപടിയും സ്വീകരിച്ചിരുന്നില്ല. ലീ​ഗ് നേതാവിന്റെ മകനായതിനാൽ കേസ് ഒഴിവാക്കാനും ശ്രമിച്ചു. കൂടാതെ കാർ ഓടിച്ച നാദിർഷയുടെ പരാതിയിൽ കേസെടുക്കുകയും ചെയ്തു. ഇത് വാർത്തയാകുകയും വ്യാപക പ്രതിഷേധം ഉയരുകയും ചെയ്തതോടെയാണ് ശൂരനാട് പൊലീസ് ഞായറാഴ്ച ജാസ്മീറിന്റെ മൊഴി രേഖപ്പെടുത്തിയത്.