ഡോക്ടറെ മർദിച്ച് മൊബൈൽ ഫോണും പണവും കവർന്നു: നടി അതുല്യ ചന്ദ്ര അറസ്റ്റിൽ

കൊച്ചി: യുവ​ഡോക്ടറെ മർദിച്ചെന്ന കേസിൽ നടി അതുല്യ ചന്ദ്ര അറസ്റ്റിൽ. മൂന്നുപേരെയാണ് കടവന്ത്ര പൊലീസ് കസ്റ്റഡിയിലെടുത്തിട്ടുള്ളത്. ചികിത്സിക്കാനെന്ന വ്യാജേന ഡോക്ടറെ വിളിച്ചുവരുത്തി മർദിക്കുകയും മൂന്ന് ലക്ഷം രൂപയുടെ മൊബൈൽ ഫോണുകൾ കവരുകയും ചെയ്തെന്നാണ് പരാതി. ഈ മാസം രണ്ടിനായിരുന്നു സംഭവം.

മർദനമേറ്റ ഡോക്ടറും അതുല്യയും സുഹൃത്തുക്കളാണ്. തന്റെ അമ്മയുടെ അനിയത്തിക്ക് ചില ആരോ​ഗ്യപ്രശ്നങ്ങളുണ്ടെന്നും എത്രയും വേ​ഗം ഫ്ലാറ്റിൽ എത്തി ചികിത്സിക്കണമെന്നും അതുല്യ ആവശ്യപ്പെടുകയായിരുന്നു. തുടർന്ന് വൈകുന്നേരം ആറരയോടെ പൊന്നുരുന്നി ഭാ​ഗത്തുള്ള അപാർട്ട്മെന്റിന്റെ മൂന്നാംനിലയിലേക്ക് എത്തുന്നത്. ഫ്ലാറ്റിൽ എത്തിയപ്പോൾ അതുല്യ ഉൾപ്പെടെ 12 പേരുണ്ടായിരുന്നു.

കേസിലെ ഒന്നാംപ്രതി ബിബിൻ ഡോക്ടറുടെ മുഖത്ത് അടിച്ചു. പിന്നീട് മറ്റ് പ്രതികളെല്ലാം ചേർന്ന് ഡോക്ടറെ കസേരയിലിരുത്തി ശരീരമാസകലം മർദിച്ചു. മൊബൈൽ ഫോണുകളും മറ്റും തട്ടിയെടുക്കുകയും ചെയ്തു.