ജമാഅത്തെ ഇസ്ലാമി ഭീകരസംഘടന; വിമർശിച്ചാൽ സഖാവാക്കുന്നു, എന്നാലും പറയാൻ ഭയമില്ല: ഉമർ ഫൈസി മുക്കം

UMAR FAIZI MUKKAM
വെബ് ഡെസ്ക്

Published on Nov 29, 2025, 06:15 PM | 1 min read

കോഴിക്കോട്‌ : ജമാഅത്തെ ഇസ്ലാമി ഭീകരവാദ സംഘടനയാണെന്നും അവരെ എതിർത്താൽ സഖാവെന്ന്‌ മുദ്രകുത്തുകയാണെന്നും സമസ്‌ത കേരള ജംഇയ്യത്തുൽ ഉലമ സംസ്ഥാന ജോയന്റ്‌ സെക്രട്ടറി ഉമർ ഫൈസി മുക്കം . മുസ്ലിം സംഘടനകളെയടക്കം അംഗീകരിക്കാത്ത മതമ‍ൗലിക പ്രസ്ഥാനമാണ്‌ ജമാഅത്തെ ഇസ്ലാമിയെന്ന്‌ സമസ്‌ത കേരള ജംഇയ്യത്തുൽ ഉലമയുടെ യുവജനസംഘടന സുന്നി യുവജനസംഘം കഴിഞ്ഞ ദിവസം പറഞ്ഞിരുന്നു. എസ്‌വൈഎസ്‌ മുഖവാരിക സുന്നിഅഫ്‌കാറിൽ പ്രസിദ്ധീകരിച്ച ലേഖനങ്ങളിലാണ്‌ ജമാഅത്തെയുമായി കൂട്ടുകൂടരുതെന്ന മുന്നറിയിപ്പുണ്ടായിരുന്നത്. ഇതിന് പിന്നാലെയാണ് ഉമര്‍ ഫെെസി മുക്കം ലീഗ് - ജമാ അത്തെ ഇസ്ലാമി ബന്ധത്തിനെതിരെ ആഞ്ഞടിച്ചത്.

ജമാഅത്തെ ഇസ്ലാമിയുടെ ആദർശം ശരിയല്ല. അവർ വളർന്നാൽ നാട്ടിൽ കുഴപ്പമുണ്ടാകും. ഇസ്ലാമിക വിരുദ്ധമാണ്‌ ജമാഅത്തെയുടെ പ്രവർത്തനം. ജമാഅത്തെ ഇസ്ലാമി ഭീകരവാദ സംഘടനയാണ്‌. ജനാധിപത്യ വ്യവസ്ഥയോടും മതേതരസ്വഭാവത്തോടും യോജിക്കാത്തവരുമാണ്‌. അവരോട്‌ കൂട്ടുചേരുന്നത്‌ അപകടമാണ്‌. ഇന്നവർ എവിടെയുമില്ല. ഇല്ലാത്ത സാധനത്തിനെ കൂട്ടുപിടിച്ച്‌ നമ്മുടെ വീടിന്റെ അടുക്കളയിലെത്തിക്കരുത്‌. ഇത്‌ പറഞ്ഞാൽ നമ്മളെ സഖാവും കമ്യൂണിസ്‌റ്റോ ഇടതുപക്ഷമോ ആക്കും. എന്നാലും അത്‌ പറയാൻ ഭയമില്ല.


തെരഞ്ഞെടുപ്പ്‌ നാളെ കഴിയും. പിന്നെയും ദീൻ ഇവിടെ നിലനിൽക്കണം. നാളെയും നമുക്കിവിടെ ജീവിക്കണം. അതിനായി മതത്തെ ചായ്‌ച്ചുകൊടുക്കുകയോ ചെരിച്ചുകൊടുക്കുകയോ ചെയ്യരുതെന്നും ഉമർ ഫൈസി പറഞ്ഞു. ഓമശേരിയിൽ സമസ്‌ത നൂറാംവാർഷിക സമ്മേളന പ്രചരണ സമ്മേളനത്തിലാണ്‌ സമസ്‌ത നേതാവ്‌ ജമാഅത്തെയെ നിശിതമായി വിമർശിച്ചത്‌.

അതേസമയം, മലപ്പുറത്ത് തദ്ദേശ തെരഞ്ഞെടുപ്പിൽ മുസ്ലിം ലീഗ്‌ കോൺഗ്രസിന്റെ സീറ്റുകൾ പിടിച്ചുവാങ്ങി ജമാഅത്തെ ഇസ്ലാമിക്ക്‌ നൽകിയതിനെതിരെ പ്രതിഷേധം കനക്കുകയാണ്. നന്നമ്പ്ര പഞ്ചായത്തിൽ കോൺഗ്രസിൽ പ്രതിഷേധം ശക്തമായി. പൊന്മുണ്ടം ആറാം വാർഡ്‌ ലീഗ്‌ വെൽഫെയറിന്‌ നൽകിയതിൽ പ്രതിഷേധിച്ച്‌ കോൺഗ്രസ്‌ സ്ഥാനാർഥിയെ നിർത്തി. മങ്കട ബ്ലോക്ക് പഞ്ചായത്ത് പടപ്പറമ്പ് ഡിവിഷനിൽ കഴിഞ്ഞ തവണ കോൺഗ്രസ്‌ ജയിച്ച സീറ്റ്‌ ലീഗ്‌ കൈയടക്കി വെൽഫെയറിന്‌ നൽകി. ഇതിൽ പ്രതിഷേധിച്ച് കോൺഗ്രസ് മണ്ഡലം പ്രസിഡന്റ്‌ കെ അബ്ദുൾ നാസർ ഉൾപ്പെടെ നിരവധി പേർ രാജിവച്ചു. ലീഗ്‌ ദേശീയ വൈസ്‌ പ്രസിഡന്റ്‌ കെ പി എ മജീദിന്റെ വീട്‌ ഉൾപ്പെടുന്ന വാർഡാണിത്‌.










deshabhimani section

Related News

View More
0 comments
Sort by

Deshabhimani

Subscribe to our newsletter

Quick Links


Home