മ‍ൗദൂദിയെ വാഴ്‌ത്തി 
ജമാഅത്തെ ഇസ്-ലാമി 
വെട്ടിലായി യുഡിഎഫ്‌

മലപ്പുറം: മതരാഷ്‌ട്രവാദ സംഘടനയായ ജമാഅത്തെ ഇസ്‌ലാമിയുടെ സ്ഥാപക നേതാവ് അബുൽ അ‌അ്‌ലാ മൗദൂദിയുടെ പ്രത്യയശാസ്‌ത്രം പ്രചരിപ്പിക്കാൻ യുവജന വിഭാഗമായ സോളിഡാരിറ്റി രംഗത്തെത്തിയതിനെച്ചൊല്ലി യുഡിഎഫിൽ വിവാദം. ജമാഅത്തെ ഇസ്‌ലാമിയെ മുന്നണിയിലെടുക്കാൻ ചർച്ച പുരോഗമിക്കുന്നതിനിടെ മ‍ൗദൂദിയൻ ആശയ പ്രചാരണവുമായി യുവജന സംഘടന നേരിട്ട്‌ രംഗത്തിറങ്ങിയതാണ്‌ മുസ്‌ലിം ലീഗ്‌, കോൺഗ്രസ്‌ നേതൃത്വത്തെ വെട്ടിലാക്കിയത്‌.

‘സയ്യിദ് മൗദൂദിയും ശൈഖ് ഖറദാവിയും: ഇസ്‌ലാമിക രാഷ്‌ട്രീയ ചിന്തയും വികാസവും' എന്ന വിഷയത്തിലാണ്‌ സോളിഡാരിറ്റി മലപ്പുറം ജില്ലാ കമ്മിറ്റി വെള്ളിയാഴ്‌ച സംവാദം സംഘടിപ്പിച്ചത്‌. സംവാദത്തിന്റെ ചിത്രങ്ങൾപോലും പുറത്തുവിട്ടില്ല. ജമാഅത്തെ മുഖപത്രമായ ‘മാധ്യമ’ത്തിൽ വാർത്ത നൽകാനോ വിവാദത്തോട്‌ നേതാക്കൾ പ്രതികരിക്കാനോ തയ്യാറായില്ല.

അതിനിടെ, ജമാഅത്തെ ഇസ്‌ലാമിയെ വെള്ളപൂശിയ പ്രതിപക്ഷ നേതാവ്‌ വി ഡി സതീശനെതിരെ യുഡിഎഫ്‌ ക്യാമ്പിൽ വിമർശമുയർന്നു. ജമാഅത്തെ മതരാഷ്‌ട്രവാദം ഉപേക്ഷിച്ചെന്നും മൗദൂദിയൻ ആശയങ്ങൾ പിന്തുടരുന്നില്ലെന്നുമായിരുന്നു സതീശൻ നിലമ്പൂർ ഉപതെരഞ്ഞെടുപ്പ്‌ സമയത്ത്‌ പറഞ്ഞത്‌. ഇത്‌ തിരിച്ചടിയായെന്നാണ്‌ വിലയിരുത്തൽ.

എൻഎസ്‌എസ്‌, എസ്‌എൻഡിപി സംഘടനകൾ യുഡിഎഫിനെതിരെ നിലപാട്‌ സ്വീകരിക്കുന്പോൾ വിവാദം തിരിച്ചടിയാകുമെന്ന്‌ നേതൃത്വം ഭയക്കുന്നു. സാമുദായിക അന്തരീക്ഷം കലുഷിതമാക്കുംവിധം പ്രചാരണം നടത്തുന്ന ജമാഅത്തെ ഇസ്‌ലാമിക്കെതിരെ സമസ്‌ത കേരള ജംഇയത്തുൽ ഉലമ ഇകെ വിഭാഗം നേരത്തെ വിമർശനമുന്നയിച്ചിട്ടുണ്ട്‌.

വഖഫ് നിയമത്തിനെതിരെ സോളിഡാരിറ്റിയും എസ്‌ഐഒയും കരിപ്പൂർ വിമാനത്താവളത്തിലേക്ക്‌ നടത്തിയ മാർച്ചിൽ മുസ്‌ലിം ബ്രദർഹുഡ്‌ നേതാക്കളുടെ ചിത്രം ഉപയോഗിച്ചിരുന്നു. ഇതിനെതിരെ സമസ്‌ത എപി വിഭാഗവും മുജാഹിദ്‌ സംഘടനകളും രംഗത്തെത്തി. എന്നിട്ടും ജമാഅത്തെ ഇസ്‌ലാമിയെ പ്രോത്സാഹിപ്പിക്കുകയാണ്‌ ലീഗ്‌.