ജമാഅത്തെ ഇസ്ലാമി കൂട്ടുകെട്ടിൽ മറുപടിയില്ല; യുഡിഎഫ്‌ ഗുരുതര പ്രതിസന്ധിയിൽ

തിരുവനന്തപുരം: തദ്ദേശ തെരഞ്ഞെടുപ്പിന്റെ പരസ്യപ്രചാരണം അവസാനിക്കാൻ ഒരാഴ്‌ചമാത്രം ബാക്കിനിൽക്കെ വിവാദങ്ങളും വർഗീയകൂട്ടുകെട്ടുകളുമായി ഗുരുതര പ്രതിസന്ധിയിലായി യുഡിഎഫ്‌. പ്രാദേശിക വികസന വാഗ്‌ദാനങ്ങൾപോലും യുഡിഎഫിന്റെ അജൻഡയിലില്ല. പകരം വിശ്വാസത്തെ ചൂഷണംചെയ്‌തും വ്യാജപ്രചാരണങ്ങളും സാമൂഹ്യമാധ്യമങ്ങളില‍ൂടെയുള്ള സൈബറാക്രമണങ്ങളിലുമാണ്‌ യുഡിഎഫിന്റെ കേന്ദ്രീകരണം.

ജമാഅത്തെ ഇസ്ലാമിയുമായി യുഡിഎഫ്‌ പരസ്യമായ ബാന്ധവം തുടങ്ങിയത്‌ കഴിഞ്ഞ നിയമസഭാ തെരഞ്ഞെടുപ്പിലാണ്‌. അതുവരെ ജമാഅത്തെ ഇസ്ലാമിയെ പരസ്യമായി തള്ളിപ്പറഞ്ഞ നേതൃത്വം രായ്‌ക്കുരാമാനം ജമാഅത്തെ നേതാക്കളെ കണ്ട്‌ വോട്ടിനായി പ്രീണിപ്പിച്ചു. മലപ്പുറം ജില്ലയായിരുന്നു ആദ്യഘട്ടത്തിൽ ഇ‍ൗ അവിശുദ്ധ സഖ്യത്തിന്റെ ഏറ്റവും വലിയ പരീക്ഷണശാല. പിന്നീട്‌ ഉപതെരഞ്ഞെടുപ്പുകളിൽ മറ്റിടങ്ങളിലും സഖ്യം ശക്തിപ്പെട്ടു. നിലമ്പൂർ ഉപതെരഞ്ഞെടുപ്പുകാലത്ത്‌ ജമാഅത്തെ ഇസ്ലാമിക്ക്‌ ഇപ്പോൾ മതരാഷ്‌ട്രവാദമില്ലെന്ന ഗുഡ്‌ സർട്ടിഫിക്കറ്റ്‌ പ്രതിപക്ഷ നേതാവ്‌ വി ഡി സതീശനും നൽകി. തദ്ദേശതെരഞ്ഞെടുപ്പിൽ യുഡിഎഫ്‌ സ്ഥാനാർഥിയാകുന്ന ജമാഅത്തെ ഇസ്ലാമിയുടെ വെൽഫെയർ പാർടി സ്ഥാനാർഥികളെ പ്രഖ്യാപിച്ചത്‌ മുസ്ലിം ലീഗ്‌ സംസ്ഥാന പ്രസിഡന്റ്‌ പാണക്കാട്‌ സാദിഖലി തങ്ങളാണ്‌.

ജമാഅത്തെ ഇസ്ലാമിയെ പടിക്കുപുറത്തുനിർത്തിയ പാണക്കാട്‌ മുഹമ്മദലി ശിഹാബ്‌ തങ്ങൾവരെയുള്ള നേതാക്കളുടെ നിലപാടുകളെ തള്ളിയാണ്‌ അവരെ യുഡിഎഫിലേക്ക്‌ കൊണ്ടുവരുന്നത്‌. മുസ്ലിംലീഗിന്റെ ഇ‍ൗ നിലപാടിൽ പ്രവർത്തകർക്കും സമസ്‌തയ്‌ക്കും എതിർപ്പുണ്ട്‌. കോൺഗ്രസ്‌ എംഎൽഎയായ രാഹുൽ മാങ്ക‍ൂട്ടത്തിൽ ലൈംഗികമായി പീഡിപ്പിച്ചതും ഗർഭഛിദ്രത്തിന്‌ നിർബന്ധിച്ചതായുമുള്ള തെളിവുകൾ പുറത്തുവന്നിട്ടും സംരക്ഷിക്കാനാണ്‌ ശ്രമം. നിരവധി സ്‌ത്രീകളുടെ പരാതികൾ അവഗണിച്ച്‌ രാഹുലിനെ എഴുന്നള്ളിച്ചത്‌ സമൂഹത്തോടുള്ള വെല്ലുവിളിയാണ്‌.

ഇതെല്ലാം തിരിച്ചടിയാകുമെന്നതിനാലാണ്‌ നാടിന്റെ വികസനംപോലും ചർച്ചചെയ്യാതെ, യുഡിഎഫ്‌ വ്യാജ പ്രചാരണങ്ങളിൽ ശ്രദ്ധ കേന്ദ്രീകരിക്കുന്നത്‌.


വെൽഫെയർ കൂട്ടുകെട്ട്‌ ഒ‍ൗദ്യോഗികമല്ലെന്ന്‌ കെ സി വേണുഗോപാൽ

കൊച്ചി : വെൽഫെയർ പാർടിയോടുള്ള നിലപാട്‌ വ്യക്തമാക്കാതെ എഐസിസി ജനറൽ സെക്രട്ടറി കെ സി വേണുഗോപാൽ. വെൽഫെയർ പാർടി വർഗീയപാർടിയാണോയെന്ന ചോദ്യത്തിന്‌ മറുപടി പറയാൻ തയ്യാറായില്ല. ഇത്‌ തദ്ദേശ തെരഞ്ഞെടുപ്പാണ്‌. പ്രാദേശികമായി ഏതെങ്കിലും പാർടികളോട്‌ കോൺഗ്രസ്‌ സഹായം തേടിയിട്ടുണ്ടാകും. എന്നാൽ, അതൊന്നും ഒ‍ൗദ്യോഗികമല്ലെന്നും വെൽഫെയർ പാർടി കൂട്ടുകെട്ടുമായി ബന്ധപ്പെട്ടുള്ള ചോദ്യങ്ങളോട്‌ കെ സി വേണുഗോപാൽ പ്രതികരിച്ചു.

വെൽഫെയർ പാർടിയെക്കുറിച്ച്‌ കോൺഗ്രസിന്‌ കൃത്യമായ നിലപാടുണ്ടെന്ന്‌ പറഞ്ഞ വേണുഗോപാലിനോട്‌ ആ നിലപാട്‌ വ്യക്തമാക്കുമോയെന്ന്‌ ചോദിച്ചപ്പോൾ മറുപടി ഇല്ലെന്ന്‌ പറഞ്ഞൊഴിഞ്ഞു. വീണ്ടും ചോദ്യങ്ങൾ ഉയർന്നപ്പോൾ ഉത്തരം പറയില്ലെന്ന്‌ നിലപാടും സ്വീകരിച്ചു.