വരുന്നു, കലിക്കറ്റിൽ ഫിഫ നിലവാരത്തിലുള്ള സ്‌റ്റേഡിയം

മലപ്പുറം: കാത്തിരിപ്പിന്‌ വിരാമം. കേരളത്തിൽ ഫിഫ നിലവാരത്തിലുള്ള അന്താരാഷ്‌ട്ര സ്‌റ്റേഡിയം വരുന്നു. സംസ്ഥാന സർക്കാരിന്റെ ഉടമസ്ഥതയിൽ കലിക്കറ്റ്‌ സർവകലാശാല ക്യാമ്പസിലാണ് സ്‌റ്റേഡിയം നിർമിക്കുക. ഇതിനായി സർവകലാശാല 35 ഏക്കർ സ്ഥലം വിട്ടുനൽകും. 50000 ത്തിലധികം കാണികൾക്ക്‌ ഇരിക്കാവുന്ന സ്‌റ്റേഡിയമാണ്‌ നിർമിക്കുക. ആദ്യ ഘട്ടമായി കിഫ്ബിയിൽ നിന്നും സംസ്ഥാന സർക്കാർ 125 കോടി രൂപ അനുവദിച്ചിട്ടുണ്ട്‌. 350 കോടി രൂപയെങ്കിലും ചെലവ്‌ വരുമെന്നാണ്‌ കരുതുന്നത്‌.

കേരളത്തിലെ ഫുട്‌ബോൾ പ്രേമികളുടെ, പ്രത്യേകിച്ച്‌ മലബാറിലെ കായിക ആരാധകരുടെ സ്വപ്‌നമാണ്‌ പുതിയ സ്റ്റേഡിയം വരുന്നതോടെ യാഥാർത്ഥ്യമാക്കുക.

സ്‌റ്റേഡിയത്തിന്റെ ഡിസൈൻ ക്ഷണിച്ചുകൊണ്ട്‌ പരസ്യം നൽകി കഴിഞ്ഞു. അന്താരാഷ്‌ട്ര ഏജൻസികൾക്ക്‌ അടക്കം സ്‌റ്റേഡിയത്തിന്റെ ഡിസൈൻ സമർപ്പിക്കാൻ അവസരമുണ്ട്‌.

എല്ലാ തരത്തിലും ഫിഫ മാനദണ്ഡങ്ങൾ പാലിച്ച്‌, രാജ്യാന്തര നിലവാരത്തിലുള്ള സ്‌റ്റേഡിയമാണ്‌ നിർമിക്കുക. പരിശീലന മൈതാനം അടക്കമുള്ള സ‍ൗകര്യങ്ങളുമുണ്ടാകും. അന്താരാഷ്‌ട്ര നിലവാരമുള്ള പ്രതലം, പുല്ല്‌, മികച്ച ഡ്രൈയിനേജ്‌ സംവിധാനം തുടങ്ങിയവ ഒരുക്കും. ശക്തമായ സുരക്ഷാ സംവിധാനമാണ്‌ ഇത്തരം സ്‌റ്റേഡിയങ്ങളുടെ മറ്റൊരു പ്രത്യേകത.

സ്‌റ്റേഡിയത്തിൽ എത്തുന്ന മുഴുവൻ ആളുകളെയും പത്ത്‌ മുതൽ പതിനഞ്ച്‌ മിനിറ്റുകൊണ്ട്‌ ഒഴിപ്പിക്കാൻ കഴിയുന്ന തരത്തിലായിരിക്കും സുരക്ഷാ സംവിധാനം. ഇതിനുള്ള ഗതാഗത സംവിധാനങ്ങളും മികച്ച നിലവാരമുള്ള റോഡുകളുമെല്ലാം ഉണ്ടാകും. ആയിര കണക്കിന്‌ വാഹനങ്ങൾ പാർക്ക്‌ ചെയ്യാനുള്ള സ‍ൗകര്യവും ഒരുക്കും.

കളി നടക്കുന്ന ദിവസങ്ങളിൽ 60,000 ത്തോളം ആളുകൾ ഇവിടെ എത്തിചേരുമെന്നാണ്‌ പ്രതീക്ഷ. കേരളത്തിന്‌ പുറത്ത്‌ നിന്നും മറ്റും എത്തുന്ന ആളുകൾ ഒന്നിലധികം ദിവസം കോഴിക്കോടും പരിസരത്തും താമസിക്കാനും സാധ്യതയുണ്ട്‌. ഇത്‌ ഹോട്ടൽ, ടാക്‌സി, ടൂറിസം മേഖലകൾക്ക്‌ വലിയ ഉണർവ്‌ പകരും.

കോഴിക്കോട്‌ നഗരത്തിലും രാമനാട്ടുകര, കൊണ്ടോട്ടി പോലുള്ള സമീപ ട‍ൗണുകളിലും കൂടുതല്ഡ ബിസിനസ് സാധ്യതകളും വരും. കോഴിക്കോട്‌, മലപ്പുറം ജില്ലകൾക്ക്‌ ഒരു പോലെ ഇതിന്റെ നേട്ടം ലഭിക്കും.

പള്ളിക്കൽ, തേഞ്ഞിപ്പലം, വള്ളിക്കുന്ന്‌, പുളിക്കൽ തുടങ്ങിയ പഞ്ചായത്തുകൾക്കും രാമനാട്ടുകര, കൊണ്ടോട്ടി നഗരസഭകൾക്കും കോഴിക്കോട്‌ നഗരത്തിനും വരുമാന വർധനവുണ്ടാകും.

സർവകലാശാലയുടെ ഭൂമി വിട്ടുനൽകാൻ സിൻഡിക്കേറ്റ്‌ യോഗം അനുമതി നൽകിയിരുന്നു. വിദഗ്‌ധ സംഘം സർവകലാശാല ക്യാമ്പസിലെത്തി സ്‌റ്റേഡിയം നിർമിക്കാൻ ഉദേശിക്കുന്ന സ്ഥലം സന്ദർശിച്ചിരുന്നു. സ്ഥലത്തിന്റെ മണ്ണ്‌ പരിശോധന അടക്കമുള്ളവ നടക്കേണ്ടതുണ്ട്‌.

അനുകൂല ഘടങ്ങൾ:

സ്‌റ്റേഡിയം വരിക ദേശീയപാത 66ന്‌ സമീപം

കരിപ്പൂർ വിമാനത്താവളം 12 കിലോ മീറ്റർ

ബേപ്പൂർ തുറമുഖം 16 കിലോ മീറ്റർ

കോഴിക്കോട്‌ റെയിൽവേ സ്‌റ്റേഷൻ 25 കിലോ മീറ്റർ

പരപ്പനങ്ങാടി റെയിൽവേ സ്‌റ്റേഷൻ 12 കിലോ മീറ്റർ

വള്ളിക്കുന്ന്‌ റെയിൽവേ സ്‌റ്റേഷൻ 11 കിലോ മീറ്റർ