'പിന്തുണ വേണ്ടെങ്കിൽ തുറന്നു പറയണം'; കോൺ​ഗ്രസിനെതിരെ ഓർത്തഡോക്സ്‌ സഭ

തിരുവനന്തപുരം: കെപിസിസി പുനഃസംഘടനയിൽ കോൺ​ഗ്രസിനെതിരെ തുറന്നടിച്ച് മലങ്കര ഓർത്തഡോക്സ്‌ സഭ. പൊതു സമൂഹത്തിന് ഉൾക്കൊള്ളാൻ കഴിയാത്ത ചില തീരുമാനങ്ങൾ കാണുമ്പോൾ സഭയും, സമൂഹവും തുറന്നു പറയുമെന്ന് ഓർത്തഡോക്സ്‌ സഭ വൈദിക ട്രസ്റ്റി ഫാ. ഡോ. തോമസ് വർ‍​ഗീസ് അമയിൽ പറഞ്ഞു. മലങ്കര സഭയുടെ പിന്തുണ വേണ്ടെങ്കിൽ അക്കാര്യം നേതൃത്വം തുറന്നു പറയണമെന്നും അദ്ദേഹം പറഞ്ഞു. കെപിസിസിയുടെ കാര്യങ്ങൾ സഭ തീരുമാനിക്കേണ്ടെന്ന കെപിസിസി പ്രസിഡന്റ് സണ്ണി ജോസഫിന്റെ വിമർശനത്തിന് പിന്നാലെയാണ് രൂക്ഷവിർശനവുമായി ഓർത്തഡോക്സ്‌ സഭ രം​ഗത്തെത്തിയത്.

'രാഷ്ട്രീയ പാർട്ടികളുടെ ആഭ്യന്തര കാര്യങ്ങളിൽ തീരുമാനമെടുക്കേണ്ടത് പാർടികൾ തന്നെയാണ്. എടുക്കുന്ന തീരുമാനങ്ങളിൽ 100 ശതമാനം തൃപ്തിയുണ്ടാകുന്നില്ല എന്ന് സമ്മതിക്കേണ്ടി വരുന്നതും പാർടി നേതൃത്വത്തിൻ്റെ മാത്രം പ്രശ്നമാണ്. പൊതു സമൂഹത്തിന് ഉൾക്കൊള്ളാൻ കഴിയാത്ത ചില തീരുമാനങ്ങൾ കാണുമ്പോൾ സഭയും, സമൂഹവും തുറന്നു പറയും. ആ അഭിപ്രായ സ്വാതന്ത്ര്യമാണ് ജനാധിപത്യത്തിൻ്റെ സൗന്ദര്യം. കഴിവുള്ള നേതാക്കൻമാർ നേതൃത്വത്തിൽ വരണം എന്നത് പൗരൻമാരുടെ സ്വപ്നമാണ്. അവരെ മതത്തിൻ്റെയും, താൽപ്പര്യങ്ങളുടെയും പേരിൽ തഴയുന്നത് സങ്കടകരമാണ്. ആ അഭിപ്രായത്തിന് ചെവികൊടുക്കാത്തവർ എങ്ങനെ ജനാധിപത്യത്തിൻ്റെ കാവൽക്കാരാകും? ഇനി അതല്ല, മലങ്കര സഭയുടെ പിന്തുണ വേണ്ടെങ്കിൽ അക്കാര്യം നേതൃത്വം തുറന്നു പറയണം. സാമുദായിക സമവാക്യങ്ങളിലൂടെ കസേര കിട്ടിയവരുടെ മറുപടി ഇവിടെ പ്രസക്തവുമല്ല. കാലാവസ്ഥ അനുകൂലമെന്ന് കണക്ക് കൂട്ടുന്നവർ ഇത് മേഘവിസ്ഫോടനങ്ങളുടെ കാലമാണെന്ന് മറക്കരുത്'- ഫാ. ഡോ. തോമസ് വർ‍​ഗീസ് അമയിൽ പറഞ്ഞു.