ഐഎഎസ് തലപ്പത്ത് അഴിച്ചുപണി; അനുകുമാരി ജിഎസ്ടി സ്പെഷ്യൽ കമീഷണൽ, ശ്രീധന്യ കാസർകോട് കലക്ടർ

തിരുവനന്തപുരം : സംസ്ഥാനത്ത് ഐഎഎസ് തലപ്പത്ത് അഴിച്ചുപണി. 36 സിവിൽ സർവീസ് ഉദ്യോ​ഗസ്ഥരെ മാറ്റി. ശബരിമലയിൽ അഡീഷണൽ ജില്ലാ മജിസ്ട്രേറ്റ് എന്ന എക്സ് കേഡർ തസ്തികയും പുതുതായി സൃഷ്ടിച്ചു.

മൂന്ന് ജില്ലകളിലെ കലക്ടർമാർരെ സ്ഥലംമാറ്റി. അനു കുമാരിയെ തിരുവനന്തപുരം ജില്ലാ കളക്ടർ സ്ഥാനത്തുനിന്നും ജിഎസ്ടി (GST) സ്പെഷ്യൽ കമീഷണറായി മാറ്റി നിയമിച്ചു. സംസ്ഥാന ലോട്ടറി ഡയറക്ടറായിരുന്ന അഞ്ജു കെ എസ് ആണ് പുതിയ കലക്ടർ. വിഴിഞ്ഞം തുറമുഖ പദ്ധതിയുമായി ബന്ധപ്പെട്ട പുനരധിവാസ പ്രശ്നങ്ങൾ പരിഹരിക്കുന്ന മോണിറ്ററിങ് കമ്മിറ്റിയുടെ ചെയർപേഴ്സന്റെ അധിക ചുമതലയും നൽകി. കാസർകോട് ജില്ലാ കലക്ടറായ അർജുൻ പാണ്ഡ്യനെ കൃഷി വകുപ്പ് ഡയറക്ടറായി മാറ്റി നിയമിച്ചു. കേര അഡീഷണൽ പ്രോജക്ട് ഡയറക്ടർ, സഹകരണ സംഘം രജിസ്ട്രാർ, സഹകരണ ഓഡിറ്റ് ഡയറക്ടർ എന്നീ അധിക ചുമതലകളും നൽകി.

ഭക്ഷ്യ സുരക്ഷ കമീഷണൽ ശ്രീധന്യ സുരേഷാണ് കാസർകോട് കലക്ടർ. ഫിഷറീസ് വകുപ്പ് ഡയറക്ടർ ചെൽസ സിനിയെ വയനാട് കലക്ടറായി മാറ്റി നിയമിച്ചു. കൃഷി വകുപ്പ് ഡയറക്ടറായിരുന്ന ശ്രീറാം വെങ്കിട്ടരാമനെ വനം-വന്യജീവി വകുപ്പിൽ ജോയിന്റ് സെക്രട്ടറിയും ഓഫീസർ ഓൺ സ്പെഷ്യൽ ഡ്യൂട്ടിയുമായി നിയമിച്ചു. തൊഴിൽ നൈപുണ്യ, കശുവണ്ടി വികസന വകുപ്പിലെ ജോയിന്റ് സെക്രട്ടറിയുടെ പൂർണ അധിക ചുമതലയും നൽകി.

ആരോഗ്യവകുപ്പ് അഡീഷണൽ സെക്രട്ടറി ഡോ. രേണു രാജിന് ദേശീയ ആരോഗ്യ ദൗത്യത്തിന്റെ സ്റ്റേറ്റ് മിഷൻ ഡയറക്ടറുടെ പൂർണ അധിക ചുമതല നൽകി. ഇ-ഹെൽത്ത് പ്രോജക്ട് ഡയറക്ടർ, സ്റ്റേറ്റ് ഹെൽത്ത് ഏജൻസി എംഡി എന്നീ അധിക ചുമതലകളും നൽകിയിട്ടുണ്ട്. കേരള മെഡിക്കൽ സർവീസസ് കോർപറേഷൻ, കേരള ഹെൽത്ത് റിസർച്ച് ആൻഡ് വെൽഫെയർ സൊസൈറ്റി എംഡി ചുമതലകളിൽ നിന്ന് രേണു രാജിനെ ഒഴിവാക്കി.

സാംസ്കാരിക കാര്യ വകുപ്പ് ഡയറക്ടർ കെ ഇമ്പശേഖറിനെ സംസ്ഥാന ലോട്ടറി വകുപ്പ് ഡയറക്ടറായി മാറ്റി നിയമിച്ചു. സാംസ്കാരിക കാര്യ ഡയറക്ടറുടെ പൂർണ അധിക ചുമതലയും വഹിക്കും. വനിത ശിശു വികസന വകുപ്പ് ഡയറക്ടർ വി വി​ഗ്നേശ്വരിക്ക് ദുരന്ത നിവാരണ കമീഷണറുടെ പൂർണ അധിക ചുമതല നൽകി. പൊതുമരാമത്ത് വകുപ്പ് അഡീഷണൽ സെക്രട്ടറി വി ആർ വിനോദിന് കെഎസ്ടിപിയുടെ പൂർണ അധിക ചുമതല നൽകി.

വ്യവസായ വകുപ്പ് ഡയറക്ടർ അരുൺ കെ വിജയനെ പൊതുവിദ്യാഭ്യാസ വകുപ്പ് ഡയറക്ടറായി മാറ്റി നിയമിച്ചു. പൊതുവിദ്യാഭ്യാസ ഡയറക്ടറായിരുന്ന സ്നേഹിൽ കുമാറാണ് വ്യവസായ ഡയറക്ടർ. വ്യവസായ വികസന കോർപറേഷൻ എംഡിയുടെ അധിക ചുമതലയും നൽകി. എറണാകുളം കലക്ടർ ജി പ്രിയങ്കയ്ക്ക് കൊച്ചി മെട്രോപൊളിറ്റൻ ട്രാൻസ്പോർട്ട് അതോറിറ്റിയുടെ അധിക ചുമതല നൽകി.

തൃശൂർ കലക്ടർ ശിഖ സുരേന്ദ്രന് കില ഡയറക്ടർ ജനറലിന്റെ പൂർണ അധിക ചുമതല നൽകി. തദ്ദേശ സ്വയംഭരണ വകുപ്പ് ജോയിന്റ് സെക്രട്ടറി ഡി ധർമലശ്രീക്ക് ശുചിത്വ മിഷൻ എക്സിക്യൂട്ടീവ് ഡയറക്ടറുടെ അധിക ചുമതല നൽകി. വാട്ടർ അതോറിറ്റി ജോയിന്റ് എംഡി ഡോ. ബിനു ഫ്രാൻസിസിനെ പട്ടിക വർ​ഗ വികസന വകുപ്പ് ഡയറക്ടറായി മാറ്റി നിയമിച്ചു. ഖനന വകുപ്പ് ഡയറക്ടർ ഡോ. ഹരികുമാറിനെ ഭക്ഷ്യ പൊതുവിതരണ വകുപ്പ് കമീഷണറായി മാറ്റി നിയമിച്ചു. കയർ വികസന വകുപ്പിന്റെ അധിക ചുമതലയും നൽകി.

സാമൂഹ്യ സുരക്ഷ വകുപ്പ് ഡയറക്ടർ അരുൺ എസ് നായർക്ക് സാമൂഹ്യ സുരക്ഷ മിഷൻ ഡയറക്ടറുടെ അധിക ചുമതല നൽകി. ലേബർ കമീഷണറായ സഫ്ന നസറുദ്ദീന് തൊഴിൽ പരിശീലന വകുപ്പ് ഡയറക്ടറുടെ പൂർണ അധിക ചുമതല നൽകി.

ജിഎസ്ടി അഡീഷണൽ കമീഷണറായിരുന്ന മുഹമ്മദ് ഷഫീക്കിനെ റവന്യു വകുപ്പ് ഒഎസ്ഡിയും ജോയിന്റ് സെക്രട്ടറിയുമാക്കി. കായിക വകുപ്പ് ഡയറക്ടർ എം സി റെജിലിനെ ലാൻഡ് റവന്യു ജോയിന്റ് കമീഷണറാക്കി. പട്ടികവർഗ വികസന വകുപ്പ് ഡയറക്ടറായിരുന്ന ഡോ. മിഥുൻ പ്രേംരാജാണ് മൈനിങ് ആൻഡ് ജിയോളജി ഡയറക്ടർ. കെഎസ്ടിപി പ്രോജക്ട് ഡയറക്ടറായിരുന്ന മിസാൽ സാഗർ ഭരതിനെ ഫിഷറീസ് ഡയറക്ടറാക്കി. വ്യവസായവകുപ്പ് ഒഎസ്ഡി സമീർ കിഷനെ കൊളീജിയറ്റ് എഡ്യൂക്കേഷൻ ഡയറക്ടറായും പ്രവേശന പരീക്ഷാകമീഷണറായും നിയമിച്ചു.

സിവിൽ സപ്ലൈസ് കോർപറേഷൻ എംഡി വി എം ജയകൃഷ്ണന് കൊച്ചി സ്മാർട്ട് സിറ്റി സിഇഒ, കേരള കൺസ്ട്രക്ഷൻ കോർപറേഷൻ എംഡി ചുമതലകൾകൂടി നൽകി. ഒ വി ആൽഫ്രഡിനെ വയോജനക്ഷേമ വകുപ്പ് ഡെപ്യൂട്ടി സെക്രട്ടറിയാക്കി. അഖിൽ വി മേനോനാണ് കായിക- യുവജനക്ഷേമ വകുപ്പ് ഡയറക്ടർ.

സുമിത് കുമാർ താക്കൂറിനെ ടൂറിസം അഡീഷണൽ ഡയറക്ടറായും കെടിഡിസി എംഡിയായും നിയമിച്ചു. ഫോർട്ട് കൊച്ചി സബ് കലക്ടർ ഗ്രന്ഥേ സായ് കൃഷ്ണയ്ക്ക് വൈറ്റില മൊബിലിറ്റി ഹബ്ബ് എംഡിയുടെ അധികചുമതല നൽകി. കാഞ്ഞങ്ങാട് സബ് കലക്ടറായിരുന്ന പി പി അർച്ചനയെ വടകര സബ് കലക്ടറാക്കി.