മല്ലപ്പള്ളിയിലെ ​സെമിത്തേരികളിലെ ​ഗ്രാനൈറ്റ് മോഷണം; മൂന്നുപേർ പിടിയിൽ

പത്തനംതിട്ട: മല്ലപ്പള്ളി മേഖലയിൽ സെമിത്തേരികളിൽ ​​ഗ്രാനൈറ്റ് മോഷണം നടത്തിയ കേസിൽ മൂന്നുപേർ അറസ്റ്റിൽ. തമിഴ്നാട് സ്വദേശി ജലാൽ സുന്ദർ, ബംഗാൾ സ്വദേശി സുർജിത്, മല്ലപ്പള്ളി പാടിമൺ സ്വദേശി സജിത്ത് എന്നിവരാണ് പിടിയിലായത്. സംഘം മല്ലപ്പള്ളിയിൽ ​ഗ്രാനൈറ്റ് വിൽപന നടത്തി വരികയായിരുന്നു. ഇതിനിടെ ​ഗ്രാനൈറ്റ് ക്ഷാമം നേരിട്ടു. ഇതോ‌ടെ പള്ളി സെമിത്തേരികളിൽ കയറി ​ഗ്രാനൈറ്റ് മോഷണം നടത്തുകയായിരുന്നു.

സമീപത്തെ ഒരു പള്ളിയിൽ നിന്ന് മോഷ്ടിച്ച ശേഷം അടുത്ത പള്ളിയിൽ മരണാനന്തര ചടങ്ങുകൾക്ക് നൽകി വരുന്നതായിരുന്നു സംഘത്തിന്റെ പതിവുരീതി. മല്ലപ്പള്ളി ഭാ​ഗത്തെ മൂന്ന് പള്ളികളിലായിരുന്നു ഇവർ ​ഗ്രാനൈറ്റ് മോഷണം നടത്തിയത്. ​ഗ്രാനൈറ്റ് പണികൾ കൃത്യമായി അറിയുന്നവരാണ് മോഷണത്തിന് പിന്നിലെന്നായിരുന്നു പൊലീസിന്റെ നി​ഗമനം.

കട്ടികുറഞ്ഞ ഗ്രാനൈറ്റ് പാളികൾ യാതൊരു കേടുപാടുകൾ വരുത്താതെ മോഷണം നടത്തിയതാണ് സംശയത്തിന് വഴിവെച്ചത്. തുടർന്ന് സിസിടിവി ക്യാമറകൾ ഇല്ലാത്ത സെമിത്തേരി പരിസരത്തിലൂടെ കടന്നുപോയ വാഹനങ്ങൾ കേന്ദ്രീകരിച്ചും കല്ലറ നിർമാണ കരാറുകാരെ കേന്ദ്രീകരിച്ചും നടത്തിയ അന്വേഷണത്തിൽ മൂവരും കുടുങ്ങുകയായിരുന്നു.