സതീശൻ അനുകൂല പ്രകടനം: നാല് പേർക്കെതിരെ നടപടി; പദവികളിൽ നിന്ന് നീക്കി

ഇടുക്കി: വി ഡി സതീശനെ മുഖ്യമന്ത്രിയാക്കണമെന്ന് ആവശ്യപ്പെട്ട് പ്രകടനം നടത്തിയവർക്കെതിരെ കോൺ​ഗ്രസ് നടപടിയെടുത്തു. ഇടുക്കിയിൽ സംഘടിപ്പിച്ച പ്രകടനത്തിന് നേതൃത്വം നൽകിയ നാല് പേരെ പദവികളിൽനിന്ന് ഡിസിസി നീക്കി.

ഡിസിസി ജനറൽ സെക്രട്ടറി വി ഇ താജുദീൻ, വെസ്റ്റ് മണ്ഡലം പ്രസിഡന്റ് രാജേഷ് ബാബു, കർഷക തൊഴിലാളി ഫെഡറേഷൻ സംസ്ഥാന സെക്രട്ടറി ജോയി മൈലാടി, ബ്ലോക്ക് കോൺ​ഗ്രസ് നേതാവ് റോബിൻ മൈലാടി എന്നിവർക്കെതിരെയാണ് നടപടിയെടുത്തത്. കൂടുതൽ പ്രവർത്തകർക്കെതിരെ വരുംദിവസങ്ങളിലും നടപടിയുണ്ടായേക്കും.

സതീശൻ അനുകൂല പ്രകടനം നടത്താൻ ഡിസിസിയുടെ ഔദ്യോ​ഗിക വാട്സാപ്പ് ​ഗ്രൂപ്പുകളിൽ ആഹ്വാനമുണ്ടായിരുന്നു. ഇതിനെതിരെ നടപടി വേണമെന്ന് മറുവിഭാ​ഗം ആവശ്യപ്പെട്ടിരുന്നു.

സതീശനെ അനുകൂലിച്ച് സംസ്ഥാനത്ത് വിവിധയിടങ്ങളിൽ പ്രകടനങ്ങൾ നടക്കുന്നുണ്ട്. കെ സി വേണു​ഗോപാലിനെ മുഖ്യമന്ത്രിയാക്കണമെന്ന് ആവശ്യപ്പെട്ട് മറുവിഭാ​ഗം ഫ്ലക്സ് ബോർഡുകളും ഉയർത്തുന്നുണ്ട്. രമേശ് ചെന്നിത്തലയുടെ അണികളും മുഖ്യമന്ത്രിക്കസേര ആവശ്യപ്പെട്ട് ബോർഡുകൾ സ്ഥാപിച്ചിട്ടുണ്ട്.