ആഭ്യന്തരമന്ത്രിക്ക് കുറ്റബോധം; ഡൽഹിയിലെ അവസ്ഥ കേരളത്തിലുണ്ടാക്കരുത്: പ്രതിപക്ഷനേതാവ്

തിരുവനന്തപുരം: തിരുവനന്തപുരത്ത് യൂണിവേഴ്സിറ്റി ഹോസ്റ്റലിൽ പൊലീസും യൂത്ത് കോൺ​ഗ്രസും നടത്തിയത് നടക്കാൻ പാടില്ലാത്ത ആക്രമണമെന്ന് പ്രതിപക്ഷനേതാവ് പിണറായി വിജയൻ പറഞ്ഞു. ഡൽഹിയിൽ വിദ്യാർഥികളെ നേരിടുന്നതുപോലുള്ള അവസ്ഥ കേരളത്തിലുണ്ടാകരുതെന്നും പിണറായി ആവശ്യപ്പെട്ടു. തിരുവനന്തപുരത്തെ വിദ്യാർഥിവേട്ടയിൽ നടപടി ആവശ്യപ്പെട്ടുള്ള അടിയന്തരപ്രമേയത്തിന് അനുമതി തേടി സംസാരിക്കുകയായിരുന്നു അദ്ദേഹം.

ആഭ്യന്തരമന്ത്രി രമേശ് ചെന്നിത്തല പൊലീസ് നടപടിയെ ന്യായീകരിച്ചപ്പോൾ, അദ്ദേഹത്തിന് കുറ്റബോധമുണ്ടെന്ന് മറുപടിയിൽനിന്ന് മനസിലായെന്നും പ്രതിപക്ഷനേതാവ് പറഞ്ഞു. മുഖ്യതെരഞ്ഞെടുപ്പ് കമീഷണർ ​ഗ്യാനേഷ് കുമാറിനെതിരായ സമരം രാജ്യത്തെ യുവതയും ജനാധിപത്യവിശ്വാസികളും ഒന്നിച്ചുനടത്തുകയാണ്. എന്നാൽ ഈ വിഷയത്തിൽ യൂത്ത് കോൺ​ഗ്രസ് നടത്തിയ സമരം യൂണിവേഴ്സിറ്റി ഹോസ്റ്റലിലെ വിദ്യാർഥികൾക്കുനേരെ തിരിച്ചുവിടുകയായിരുന്നു. ഹോസ്റ്റലിലേക്ക് തീപ്പന്തവും കുപ്പികളും വലിച്ചെറിഞ്ഞു. പവർകട്ട് ഉണ്ടായപ്പോൾ വിദ്യാർഥികൾ കൂവിയത് എങ്ങനെയാണ് യൂത്ത് കോൺ​ഗ്രസിനെതിരായ പ്രകോപനമാകുന്നതെന്നും പ്രതിപക്ഷനേതാവ് ചോദിച്ചു.

അടിയന്തരാവസ്ഥയിൽ പൊലീസ് പിന്നിലും അക്രമികൾ മുന്നിലും നടന്ന് കൊടുവാൾ അടക്കമുള്ള ആയുധങ്ങളുമായി ആക്രമണം നടത്തുമായിരുന്നു. ആക്രമണത്തെ പ്രതിരോധിക്കുന്നവരെ പൊലീസ് നേരിടും. ഇതായിരുന്നു അന്നത്തെ രീതി. ഇപ്പോൾ യൂത്ത് കോൺ​ഗ്രസ് ആക്രമണത്തിന് ശേഷം പൊലീസുകാർ ഹോസ്റ്റലിലേക്ക് കയറി വിദ്യാർഥികളെ ഭീകരമായി മർദിച്ചു. പൊലീസുകാർ രണ്ട് കയ്യുംകൂടി ഉപയോ​ഗിച്ചാണ് ലാത്തിച്ചാർജ് നടത്തിയത്. വിദ്യാർഥികളുടെ തല ലക്ഷ്യമാക്കിയാണ് അടിച്ചത്. വേണു, ശ്രീകുമാർ എന്നീ വിദ്യാർഥികളുടെ തലപൊട്ടി. വൈഷ്ണവിക്ക് കണ്ണിനാണ് പരിക്കേറ്റത്. എന്തുകൊണ്ടാണ് പൊലീസുകാർ വിദ്യാർഥികൾ തലയ്ക്കടിച്ചതെന്ന് പരിശോധിക്കണം.

പ്രകടനം ഹോസ്റ്റലിന്റെ മുന്നിൽനിന്ന് ആരംഭിച്ചത് തന്നെ മുൻകൂട്ടി പദ്ധതിയിട്ടത് പ്രകാരമാണ്. സാധാരണയായി ഇവിടെനിന്നല്ല പ്രകടനങ്ങൾ തുടങ്ങുക. ആസൂത്രിതമായ ആക്രമണമാണുണ്ടായത്. പരിക്കേറ്റവരെ കൊണ്ടുപോയ ആംബുലൻസ് പോലും തടഞ്ഞു. ജനറൽ ആശുപത്രി പരിസരത്തും യൂത്ത് കോൺ​ഗ്രസുകാർ അഴിഞ്ഞാടി.

കന്റോൺമെന്റ് എസ്ഐക്കും സിഐക്കുമാണ് ഇതിന്റെ ഉത്തരവാദിത്തം. എസ്എഫ്ഐ ജില്ലാ സെക്രട്ടറിയുടെ വീട്ടിൽപോയി തോക്ക് പ്രദർശിപ്പിക്കുകയും ഭീഷണിപ്പെടുത്തുകയും ചെയ്തു. എങ്ങനെയാണ് ഇതിനെല്ലാമുള്ള അതിർകവിഞ്ഞ ധൈര്യം പൊലീസിന് ലഭിച്ചതെന്നും പ്രതിപക്ഷനേതാവ് ചോദിച്ചു.

അടൂരിൽ ഡിവൈഎഫ്ഐ നടത്തിയ നൈറ്റ് മാർച്ചിനുനേരെ യൂത്ത് കോൺ​ഗ്രസുകാർ ആക്രമണം നടത്തി. പാലക്കാട് മദ്യപിച്ച് ലക്കുകെട്ട പൊലീസുകാരനാണ് എസ്എഫ്ഐക്കാരെ മർദിച്ചത്. കുറ്റ്യാടിയിൽ ഡിവൈഎഫ്ഐക്കാരെ തല്ലിച്ചതച്ചാണ് ലോക്കപ്പിൽ അടച്ചത്.

സംഘപരിവാറുകാർ തിരുവനന്തപുരം ഡിസിസി ഓഫീസിന് നേരെ ആക്രമണമുണ്ടാകുകയും മന്ത്രിയെ വഴിയിൽ തടയുകയും ചെയ്തിരുന്നു. എന്നാൽ അതിലൊന്നും ശക്തമായ നടപടി ഉണ്ടായില്ല. സംഘപരിവാറിനെതിരെ വലിയ ഇടപെടൽ വേണ്ട എന്ന നിലപാടാണ് സർക്കാരിനെന്നും പ്രതിപക്ഷനേതാവ് പറഞ്ഞു.