ദേശാഭിമാനി ന്യൂസ്‌ എഡിറ്റർ എൻ ശശി വിരമിച്ചു
തിരുവനന്തപുരം : ദേശാഭിമാനി തിരുവനന്തപുരം ന്യൂസ്‌ എഡിറ്റർ എൻ ശശി സർവീസിൽനിന്ന്‌ വിരമിച്ചു. കണ്ണൂർ കൂത്തുപറമ്പ്‌ പഴയനിരത്ത്‌ സ്വദേശിയായ എൻ ശശി 1993ൽ സബ്‌ എഡിറ്റർ ട്രെയിനിയായി ജോലിയിൽ പ്രവേശിച്ചു. കോഴിക്കോട്‌, വയനാട്‌ ബ്യൂറോകളിലും കൊച്ചിയിലും തിരുവനന്തപുരത്ത്‌ സെൻട്രൽ ഡെസ്‌കിലും പ്രവർത്തിച്ചു.
വയനാട്ടിൽ ആദിവാസി ഭൂസമരം ശക്തമായിരുന്ന കാലത്ത്‌ ശശിയുടെ റിപ്പോർട്ടുകൾ ഏറെ ശ്രദ്ധനേടി. കലോത്സവങ്ങൾ, പാർടി സമ്മേളനങ്ങൾ, തെരഞ്ഞെടുപ്പുകൾ എന്നിവയ്‌ക്കുവേണ്ടിയുള്ള പ്രത്യേക ഡെസ്‌കുകളുടെ ചുമതലക്കാരനായി.
പേരാവൂർ ഏരിയ ലേഖകനായും പ്രവർത്തിച്ചു. ഡിവൈഎഫ്‌ഐ കോളയാട്‌ പഞ്ചായത്ത്‌ സെക്രട്ടറി, പേരാവൂർ ബ്ലോക്ക്‌ ജോയിന്റ്‌ സെക്രട്ടറി, പുരോഗമന കലാസാഹിത്യ സംഘം പേരാവൂർ ഏരിയ സെക്രട്ടറി, കണ്ണൂർ ജില്ലാ ജോയിന്റ്‌ സെക്രട്ടറി, സിപിഐ എം കോളയാട്‌ ലോക്കൽ കമ്മിറ്റി അംഗം, ടൗൺ ബ്രാഞ്ച്‌ സെക്രട്ടറി, ദേശാഭിമാനി തിരുവനന്തപുരം എഡിറ്റോറിയൽ ബി ബ്രാഞ്ച്‌ സെക്രട്ടറി എന്നീ ചുമതലകളും വഹിച്ചു. നിലവിൽ എഡിറ്റോറിയൽ ബി ബ്രാഞ്ചംഗം. ഭാര്യ: ടി സുപ്രിയ. മകൾ: ഡോ. എസ്‌ ദിയ.
യാത്രയയപ്പു യോഗം റസിഡന്റ്‌ എഡിറ്റർ എം സ്വരാജ്‌ ഉദ്‌ഘാടനം ചെയ്‌തു. ജനറൽ മാനേജർ കെ ജെ തോമസ്‌ അധ്യക്ഷനായി. അസോസിയേറ്റ്‌ എഡിറ്റർ എൻ മധു, ചീഫ്‌ ന്യൂസ്‌ എഡിറ്റർ കെ പ്രേമനാഥ്‌, ബ്യൂറോ ചീഫ്‌ സി കെ ദിനേശ്‌, ന്യൂസ്‌ എഡിറ്റർമാരായ ടി ചന്ദ്രമോഹൻ, ഡി ദിലീപ്‌, അസിസ്‌റ്റന്റ്‌ എഡിറ്റർമാരായ കെ ആർ അജയൻ, പി ഒ ഷീജ, ദിലീപ്‌ മലയാലപ്പുഴ, യൂണിറ്റ്‌ മാനേജർ ഐ സെയ്‌ഫ്‌, സിപിഐ എം ദേശാഭിമാനി ലോക്കൽ സെക്രട്ടറി പി അനിൽകുമാർ, എച്ച്‌ആർ മാനേജർ എസ്‌ ശ്യാംസുന്ദർ, കെ വി സുധാകരൻ, ആർ രാജേഷ്‌, കെ എസ്‌ പ്രദീപ്‌ എന്നിവർ സംസാരിച്ചു. എൻ ശശി മറുപടി പറഞ്ഞു.
0 comments