നിതിന്‍ രാജിന്‍റെ കുടുംബത്തെ ചേർത്ത് പിടിച്ച് സിപിഐ എം; വീടിന്റെ തറക്കല്ലിടൽ എം വി ​ഗോവിന്ദൻ നിർവഹിച്ചു

തിരുവനന്തപുരം: അധ്യാപകരുടെ ജാതീയ അധിക്ഷേപത്തെ തുടർന്ന് ജീവനൊടുക്കിയ നെടുമങ്ങാട് ഉഴമലയ്ക്കൽ സ്വദശിയും അഞ്ചരക്കണ്ടി ദന്തൽ കോളജ് വിദ്യാർഥിയുമായ നിതിൻ രാജിന്റെ കുടുംബത്തിന് സിപിഐ എം നിർമിച്ച് നൽകുന്ന വീടിന്റെ തറക്കല്ലിടലും പ്രവൃത്തി ഉദ്ഘാടനവും സംസ്ഥാന സെക്രട്ടറി എം വി ​ഗോവിന്ദൻ നിർവഹിച്ചു.

ചടങ്ങിൽ സിപിഐ എം ജില്ലാ ആക്‌ടിങ്‌ സെക്രട്ടറി എ എ റഹിം, സംസ്ഥാന കമ്മിറ്റിഅംഗം എം വിജയകുമാർ, ജി സ്റ്റീഫൻ എംഎൽഎ, സിഐടിയു സംസ്ഥാന സെക്രട്ടറി കെ എസ്‌ സുനിൽകുമാർ, നിധിൻരാജിന്റെ സഹോദരിഭർത്താവ്‌ പോൾ റോബർട്ട്‌ തുടങ്ങിയവർ പങ്കെടുത്തു.

നിതിൻ രാജിന്റെ കുടുംബാ​ഗങ്ങൾ നിർദ്ദേശിച്ച പ്രകാരമുള്ള സ്ഥലത്ത് തന്നെയാണ് വീട് ഉയരുന്നതെന്നും 1118 സ്ക്വയർ ഫീറ്റുള്ള ഇരുനില കെട്ടിടമാണ് പണിയുന്നതെന്നും എ എ റഹീം പറഞ്ഞു. സിപിഐ എം വിളപ്പിൽ, വിതുര ഏരിയ കമ്മിറ്റികൾ ചേർന്നാണ് വീട് നിർമ്മിക്കുക.

കേരളത്തെ ദുഃഖത്തിലാഴ്ത്തിയ ദുരന്തവാർത്തയായിരുന്നു നിതിൻ രാജിന്റെ വിയോ​ഗം. നിതിന്റെ മരണം ആ കുടുംബത്തെയാണ് അനാഥമാക്കിയത്. എല്ലാ അർഥത്തിലും നിതിന്റെ കുടുംബത്തോടൊപ്പമെന്ന് എം വി ​ഗോവിന്ദന്‍ ഉറപ്പ് നൽകിയിരുന്നു. മന്ത്രി വി ശിവൻകുട്ടിയും നിതിന്റെ വീട് സന്ദർശിക്കുകയും കുടുംബത്തോടൊപ്പം എന്നും ഉണ്ടാകുമെന്ന് ഉറപ്പും നൽകിയിരുന്നു. ഇതിന്റെയെല്ലാം പശ്ചാത്തലത്തിൽ നടത്തിയ കൂടിയാലോചനയിലാണ് നിതിന്റെ കുടുംബത്തിന് സിപിഐ എം വീട് വെച്ച് നൽകാൻ തീരുമാനം എടുത്തത്.