കേന്ദ്ര ധനകമീഷൻ വിഹിതം: ഗ്രമങ്ങൾക്ക് പ്രഹരം; നഷ്ടം കോടികൾ

തിരുവനന്തപുരം: പതിനാറാം കേന്ദ്ര ധനകമീഷന്റെ തീരുമാനത്തിൽ ഗ്രാമപ്പഞ്ചായത്തുകൾക്ക് കോടിക്കണക്കിന് രൂപയുടെ വിഹിതം നഷ്ടമാകും. നഗരവൽക്കരണത്തിന്റെ പ്രാധാന്യം കണക്കിലെടുത്തുകൊണ്ടുള്ള നടപടിയാണ് ​ഗ്രാമങ്ങൾക്ക് ​പ്രഹരമാവുന്നത്.

‌15-ാം കമീഷൻ്റെ കാലയളവിൽ നഗരങ്ങൾക്കുള്ള വിഹിതം 39.92 ശതമാനവും ഗ്രാമീണ മേഖലയുടേത് 60.07 ശതമാനവും ആയിരുന്നു. 16-ാം കമീഷൻ്റെ കാലയളവിൽ ന​ഗരങ്ങൾക്ക് 83.45 ശതമാനമായി ഉയർത്തുകയും ​ഗ്രാമങ്ങൾക്ക് 16.55 ശതമാനം ആയി കുറയ്ക്കുകയും ചെയ്തു. സംസ്ഥാനത്തെ നഗരവത്കൃത പ്രദേശങ്ങളിലെ ജനസംഖ്യ 2.99 കോടിയാണെന്നാണ് കേന്ദ്ര ധനകാര്യ കമീഷൻ്റെ കണക്ക്. ഗ്രാമ ജനസംഖ്യ 37 ലക്ഷം മാത്രമേയുള്ളൂ. ഇതിന്റെ അടിസ്ഥാനത്തിലാണ് ഭൂരിപക്ഷവും നഗരസഭകൾക്കു നീക്കിവെച്ചത്.

ഇതോടെ ന​ഗരവത്കരിക്കപ്പെട്ട കേരളത്തിലെ ​ഗ്രാമപഞ്ചായത്തുകൾക്ക് അവകാശപ്പെട്ട വിഹിതം ലഭികാതെ പോകും. ഈ വിഹിതം ന​ഗര സഭകളിൽ മാത്രമാണ് വിനിയോ​ഗിക്കാൻ കഴിയുക. 93 ന​ഗരസഭകളിൽ ഭൂരിപക്ഷം തുകയും ചെലവഴിക്കപ്പെടുമ്പോൾ ആയിരത്തിന് അടുത്ത വരുന്ന പഞ്ചായത്തുകൾ കടുത്ത വിവേചനമാണ് നേരിടുന്നത്.