ചുമ മരുന്ന്: വിദഗ്‌ധസമിതി റിപ്പോർട്ട്‌ നൽകി ; മാര്‍ഗരേഖ പുറത്തിറക്കാൻ ഒരുങ്ങി കേരളം
തിരുവനന്തപുരം
കുട്ടികളുടെ ചുമ മരുന്നിന്റെ ഉപയോഗം സംബന്ധിച്ച് കേരളം പ്രത്യേകം മാർഗരേഖ പുറത്തിറക്കും. ചുമ മരുന്നുകളുടെ ഉപയോഗം പഠിക്കാനായി രൂപീകരിച്ച മൂന്നംഗ വിദഗ്ധ സമിതി
ആരോഗ്യ വകുപ്പിന് റിപ്പോര്‍ട്ട് കൈമാറി. സംസ്ഥാന ഡ്രഗ്സ് കണ്‍ട്രോളര്‍, ചൈല്‍ഡ് ഹെല്‍ത്ത് നോഡല്‍ ഓഫീസര്‍, ഐഎപി (ഇന്ത്യൻ അക്കാദമി ഓഫ്‌ പീഡിയാട്രിക്സ്‌) സംസ്ഥാന പ്രസിഡന്റ് എന്നിവരടങ്ങിയ സമിതിയാണ്‌ റിപ്പോർട്ട്‌ നൽകിയത്‌. റിപ്പോര്‍ട്ടിന്റെ അടിസ്ഥാനത്തിലായിരിക്കും മാര്‍ഗരേഖ പുറത്തിറക്കുക. ഐഎപിയുടെ സഹകരണത്തോടെ ഡോക്ടര്‍മാര്‍ക്ക്‌ പരിശീലനം നല്‍കുമെന്ന്‌ മന്ത്രി വീണാ ജോർജ്ജ്‌ അറിയിച്ചു.
അംഗീകൃത ഡോക്ടറുടെ കുറിപ്പടിയില്ലാതെയും പഴയ കുറിപ്പടിവച്ചും 12 വയസ്സിന് താഴെയുള്ള കുട്ടികള്‍ക്ക് മരുന്ന് നല്‍കരുതെന്ന്‌ ഡ്രഗ്സ് കണ്‍ട്രോളര്‍ മരുന്നു വ്യാപാരികൾക്കും ഫാർമസിസ്‌റ്റുകൾക്കും നിര്‍ദേശംനല്‍കി. ബോധവൽകരണവും ശക്തമാക്കി. മന്ത്രി വീണാ ജോര്‍ജിന്റെ നേതൃത്വത്തില്‍ ചേർന്ന ഉന്നതതല യോഗത്തിൽ ആരോഗ്യ അഡീഷണല്‍ ചീഫ് സെക്രട്ടറി, എന്‍എച്ച്എം സ്റ്റേറ്റ് മിഷന്‍ ഡയറക്ടര്‍, ഡ്രഗ്സ് കണ്‍ട്രോളര്‍, ആരോഗ്യ വകുപ്പ് ഡയറക്ടര്‍, മെഡിക്കല്‍ വിദ്യാഭ്യാസ വകുപ്പ് ഡയറക്ടര്‍, അഡീഷണല്‍ ഡയറക്ടര്‍മാര്‍, ജില്ലാ മെഡിക്കല്‍ ഓഫീസര്‍മാര്‍, ചൈല്‍ഡ് ഹെല്‍ത്ത് നോഡല്‍ ഓഫീസര്‍, ഐഎപി പ്രസിഡന്റ് തുടങ്ങിയവര്‍ പങ്കെടുത്തു.
മധ്യപ്രദേശിൽ അപകടമുണ്ടാക്കിയതായി കരുതുന്ന കോർഡ്‌റിഫ്‌ എസ്ആർ 13 ബാച്ച് ചുമ മ രുന്ന്‌ കേരളത്തിൽ വിൽപ്പനയ്ക്ക് എത്തിച്ചിട്ടില്ലെന്നാണ് ഡ്രഗ്സ് കൺട്രോൾ വിഭാഗത്തിന്റെ കണ്ടെത്തൽ. ജാഗ്രതയുടെ ഭാഗമായി ആശുപത്രി ഫാർമസികളിലും മെഡിക്കൽ സ്റ്റോറുകളിലും ഡ്രഗ്സ് കൺട്രോൾ വകുപ്പ് പരിശോധന തുടരും. 86 മരുന്നുകളുടെ സാമ്പിൾ പരിശോധനയ്ക്കായി ശേഖരിച്ചു. അനുവദനീയമായതിലുമധികം ഡൈഎത്തിലീൻ ഗ്ലൈക്കോൾ ഉണ്ടോ എന്ന്‌ പരിശോധിക്കുന്നതിനാണ്‌ ഇത്‌.
Related News
Dont Miss it
0 comments